...

Avropa Məhkəməsi ilə Azərbaycan hökuməti arasında parlament seçkiləri ilə bağlı daha bir şikayət üzrə kommunikasiya başlayıb

Cəmiyyət Materials 2 Fevral 2009 12:28 (UTC +04:00)

Azərbaycan, Bakı, 02 fevral / Trend , müxbir K.Zərbalıyeva/ Avropa İnsan Hüquqları Məhkəməsi ilə Azərbaycan hökuməti arasında 2005-ci ilin  parlament seçkiləri ilə bağlı daha bir şikayət üzrə kommunikasiya başlayıb.

Hüquq Maarifçiliyi Cəmiyyətindən bazar ertəsi Trend -a verilən məlumata görə, Avropa Məhkəməsi İlham Hüseynin şikayəti üzrə dövlətə sorğu göndərib və cavab üçün bu ilin may ayının 13-nə qədər dövlətə vaxt verilib.

Hüseyn 31 saylı Suraxanı 2-ci seçki dairəsindən namizədliyini özü irəli sürüb. Bu dairədən seçkilərin yekunların görə, Yeni Azərbaycan Partiyasının nümayəndəsi Əhməd Vəliyev qalib elan edilib.

Seçkinin kütləvi qanun pozuntuları və çox ciddi saxtakarlıqlarla müşayiət olunduğunu iddia edən Hüseyn 31 saylı seçki dairəsi üzrə seçkilərin nəticələrinin ləğv edilməsi və seçki qanunvericiliyinin tələblərini pozan vəzifəli şəxslərin cinayət məsuliyyətinə cəlb edilməsi məqsədilə hüquq-mühafizə orqanlarına müraciət edilməsi ilə bağlı 16 may 2006-cı ildə MSK-ya şikayət verib. MSK qanunla müəyyən olunmuş müddətdə şikayətə cavab verməyib.

Hüseyn MSK-nın hərəkətsizliyindən Apellyasiya Məhkəməsinə şikayət verib. Həmin məhkəmə şikayəti rədd edib. Ərizəçinin həmin qətnamədən verdiyi kassasiya şikayətini Ali Məhkəmə təmin etməyib.

MSK-nın hərəkətsizliyi ilə baglı məhkəməyə verdiyi şikayəti Apellyasiya Məhkəməsi əsassız olduğundan təmin etməyib.


24 iyul 2006-cı ildə Strasburqa göndərdiyi şikayətdə ərizəçi Əsas İnsan Hüquq və Azadlıqları haqqında Avropa  Konvensiyasının 1 saylı Protokolunun 3-cü (azad seçki hüququ), Konvensiyanın 13 (səmərəli müdafiə vasitələrinə olan hüquq), 14-cü (ayrı-seçkiliyə məruz qalmamaq hüququ) və Konvensiyanın 1 saylı Protokolunun 1-ci (mülkiyyət hüququ) maddələri ilə nəzərdə tutulan hüquqlarına əsassız müdaxilə baş verdiyini iddia edir.

Bundan qabaq parlament seçkiləri ilə bağlı daha 14 iş Avropa Məhkəməsi ilə Azərbaycan hökuməti arasında kommunikasiya başlamışdı.

Avropa Məhkəməsi Azərbaycana qarşı 16 qərar çıxarıb.

Məqalə müəllifi ilə əlaqə ünvanı:[email protected]

Xəbər lenti

Xəbər lenti