Azərbaycan, Bakı, 18 may / Trend , müxbir, K. Zərbalıyeva /
Azərbaycanın 20 regionunda dövlət xətti ilə əhaliyə pulsuz hüquqi yardım göstərəcək hüquq məsləhət xidmətləri fəaliyyətə başlayır.
Ədliyyə Nazirliyinin mətbuat xidmətindən Trend -a verilən məlumata görə, mərkəzlər əhalinin xüsusilə aztəminatlı təbəqəsinə pulsuz hüquqi yardım göstərəcək və onların maarifləndirilməsini həyata keçirəcək.
Sumqayıt, Gəncə və Şirvan şəhərlərində, Goranboy, Ağstafa, Gədəbəy, Yevlax, Beyləqan, Şəki, Göyçay, Qəbələ, Qusar, Siyəzən, Şamaxı, İmişli, Salyan, Lerik, Masallı rayonlarında və Naxçıvan Muxtar Respublikasında yerləşən bu regional mərkəzlərdə işləmək üçün yerli hüquqşünaslar arasında seçim aparılır.
Ədliyyə Nazirliyi həmin mərkəzlərdə işləmək istəyən yüksək nəzəri, peşə hazırlığına və müvafiq təcrübəyə malik olan ali təhsilli hüquqşünasları işə dəvət edir.
Mərkəzlər Prezidentin Sərəncamı ilə təsdiq edilmiş "2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı"na müvafiq olaraq yaradılır.
Məqalə müəllifi ilə əlaqə ünvanı: [email protected]
