Azərbaycan, Bakı, 13 may /Trend, müxbir M. Əliyev/
Azərbaycan Gənclər və İdman Nazirliyinin maliyyə dəstəyi ilə "Bizim Nəsil" Gənclərin Regional İnkişaf Assosiasiyası İctimai Birliyi uşaqlar üçün "Azərbaycan İncəsənəti" ensiklopedik məlumat kitabının 1-ci cildini çap edib. Bu barədə Trend-ə Gənclər və İdman Nazirliyindən bildiriblər.
Kitabda qədim tarixə və zəngin bədii ənənələrə malik Azərbaycan incəsənətinin təsviri sənəti, dekorativ tətbiqi sənəti və memarlığı haqqında məlumatlar əksini tapıb. Uşaqlar üçün ensiklopediya xarakteri daşıyan bu kitabda adları Azərbaycan incəsənəti tarixinə həkk olunmuş görkəmli sənətkarlar, özünəməxsus bədii məziyyətə malik dünyaşöhrətli sənətkarlıq nümunələri haqqında yığcam məlumat verilir. Materiallar, əsasən, incəsənətin rəngkarlıq, qrafika, heykəltəraşlıq, dekorativ-tətbiqi sənət və memarlıq sahələrini əhatə edir. Kitaba ilk dəfə olaraq gənclər və uşaq yaradıcılığına həsr olunmuş ayrıca bölmələr daxil edilib.
"Azərbaycan İncəsənəti" kitabı 2500 tirajla buraxılıb, Bakıda və regionlarda olan kitabxanalara və məktəblərə pulsuz olaraq paylanacaq. Kitabın tərtibçiləri Azərbaycanın əməkdar incəsənət xadimi Ziyadxan Əliyev və gənc sənətşünas Aslan Xəlilovdur.
Yaxın gələcəkdə kitabın 2-ci və 3-cü cildləri də hazırlanaraq nəşr olunacaq və geniş oxucu kütləsinə təqdim ediləcək.