Azərbaycan, Bakı, 20 yanvar /Trend, müxbir İlhamə İsabalayeva/
Azərbaycanda məktəbəqədər və ümumi təhsil müəssisələrinin pedaqoji və idarəetmə heyəti sertifikatlaşdırılmadan keçəcək. Trend-in məlumatına görə, bu, Azərbaycan Prezidenti İlham Əliyev tərəfindən təsdiqlənən "Azərbaycan Respublikasında təhsilin inkişafı üzrə Dövlət Strategiyası"nın həyata keçirilməsi ilə bağlı Fəaliyyət Planı"nda nəzərdə tutulub.
Yeni sənədə əsasən, 2015-2016-cı illərdə Təhsil Nazirliyi məktəbəqədər və ümumi təhsil üzrə pedaqoji və idarəetmə heyətinin sertifikatlaşdırılması mexanizmini hazırlayacaq. Bu mexanizm 2016-cı ildən başlayaraq tətbiq ediləcək.
2016-cı ildə Təhsil Nazirliyi təhsil müəssisələrinin reytinq sistemini yaradacaq. 2017-ci ildə nazirlik təhsil müəssisələri şəbəkəsinin rasionallaşdırılması ilə bağlı təhsil pillələri üzrə dövlət proqramları hazırlayaraq hökumətə təqdim edəcək.
2018-2025-ci illərdə Təhsil Nazirliyi, İqtisadiyyat və Sənaye Nazirliyi təhsil müəssisələri şəbəkəsinin rasionallaşdırılması ilə bağlı təhsil pillələri üzrə dövlət proqramlarını həyata keçirəcəklər.