...

Cəmil Quliyev İTV-nin baş direktoru vəzifəsindən azad olundu - Yerinə təyinat var

Cəmiyyət Materials 11 May 2018 16:17 (UTC +04:00)
İTV Yayım Şurasının bugünkü iclasında telekanalın baş direktoru Cəmil Quliyevin səlahiyyətlərinə xitam verilib.
Cəmil Quliyev İTV-nin baş direktoru vəzifəsindən azad olundu - Yerinə təyinat var

Trend-i buradan izləyin

Bakı. Elçin Mehdiyev - Trend:

İTV Yayım Şurasının bugünkü iclasında telekanalın baş direktoru Cəmil Quliyevin səlahiyyətlərinə xitam verilib. Bu barədə Trend-ə İctimai Televiziya və Radio Yayımları şirkətinin Yayım Şurasından bildiriblər.

Bildirilib ki, C.Quliyev səhhəti və gələcək yaradıcılıq planları ilə əlaqədar vəzifədən getmək istəyi ilə bağlı şuraya rəsmi müraciət edib və müzakirədən sonra müvafiq qərar qəbul olunub.

Şuranın iclasında Balakişi Qasımov İTV-nin yeni baş direktoru seçilib.

Məsələ ilə əlaqədar açıqlama verən C.Quliyev deyib ki, səhhətində yaranmış problemlər, eyni zamanda, həm İTV-nin baş direktoru kimi məsuliyyətli vəzifənin keyfiyyətli icrasına, həm də çoxsaylı yaradıcılıq planlarını həyata keçirməsinə imkan verməyib: “Ona görə də belə qərara gəldim ki, bundan sonra yalnız mədəniyyət, incəsənət və elm sahəsində, habelə ictimai fəaliyyətimi davam etdirim və nəzərdə tutduğum planları həyata keçirim.

Mən İTV-nin baş direktoru vəzifəsində göstərilən etimada görə, ilk növbədə, Azərbaycan Prezidenti cənab İlham Əliyevə minnətdarlığımı bildirirəm. Eyni zamanda, İTV Yayım Şurasının üzvlərinə, televiziyanın kollektivinə təşəkkür edir və onlara gələcək fəaliyyətlərində yeni yeni uğurlar arzulayıram.

Onu da deməyi özümə borc bilirəm ki, hansı sahədə çalışmağımdan asılı olmayaraq, həmişə cənab Prezidentin sadiq əsgəri olacağam, Azərbaycan mədəniyyətinin, incəsənətinin inkişafına bacardığım töhfəni verməyə çalışacağam”.

Qeyd edək ki, Balakişi Ələkbər oğlu Qasımov 1978-ci ildə Bakıda anadan olub. Bakıda 1 saylı orta məktəbi bitirib. Azərbaycan Dövlət İqtisad Universitetinin (maliyyə ixtisası) məzunudur.

"Kim? Harada? Nə vaxt?" elitar klubunun oyunçusu, Azərbaycanda "Kim? Harada? Nə vaxt?" oyununun aparıcısı və baş prodüseri, "Gametv.az" prodüser mərkəzinin rəhbəridir.

Məqalədə:
Xəbər lenti

Xəbər lenti