Bakı. Trend:
Bu yaxınlarda A-Qroup sığorta şirkətinin İdarə Heyətinin sədri Abas Miskərlinin rəhbərliyi altında baş və regional idarələrin şöbə və şöbə müdirləri şirkətin Gəncə şəhərindəki 2008-ci ildən fəaliyyət göstərən ofisində görüş keçiriblər.
Ofisdə keçirilən görüş zamanı regional inkişaf strategiyası, sığorta məhsullarının təkmilləşdirilməsi, müştərilər üçün keyfiyyətli xidmət və rahatlığın təmin edilməsi yolları müzakirə edilib.
Gəncədəki nümayəndəlik fəaliyyətə başladığı ilk gündən etibarən həm fiziki şəxslərə, həm də korporativ müştərilərə şirkətin bütün sığorta məhsulları və xidmətlərini təqdim edir. Yeni sığorta müqavilələrin bağlanmasında və ya mövcud müqavilələrin müddətinin uzadılmasında, habelə dəymiş zərərin ödənilməsində sığortalıya yüksək keyfiyyətli xidmət və operativ yardım göstərilir. A-Qroup Sığorta Şirkətinin Gəncə şəhərindəki komandası təcrübəli sığortaçılardan və məsuliyyətli mütəxəssislərdən ibarətdir.
A-Qroup-un Gəncədəki nümayəndəliyi dövlət tərəfindən qorunan qədim memarlıq abidəsi sayılan binada yerləşir. Bina 1875-ci ildə tikilib və inqilaba qədər Babaxanovlar ailəsinə məxsus olub. Bu gün o, A-Qroup Sığorta Şirkətinin mülkiyyəti və fəxridir.
Agentlik şəbəkəsinin inkişaf etdirilməsi və pərakəndə satışın artırılması şirkətin strateji hədəflərindəndir. Qarşıya qoyulan məqsədlərə nail olmaq üçün A-Qroup regionlarda ofislərinin sayını artırmağa davam edir. Bu günə kimi şirkət artıq Bakı, Gəncə, Lənkəran, Şəki, Quba və s. şəhərlərdə təmsil olunub.
Xatırladaq ki, sığorta bazarında 26 ildən çox uğurla fəaliyyət göstərən A-Qroup Sığorta Şirkəti dinamik inkişaf edir və müştərilərə göstərilən xidmətin təkmilləşdirilməsinə, sığorta ödənişlərinin ödənilməsi müddətinin qısaldılmasına və zərərlərin ödənilməsi prosesinin səmərəliliyinin artırılmasına diqqəti davam etdirir. A-Qroup fərdi və korporativ müştərilərə 14 könüllü və 3 icbari sığorta növü üzrə geniş sığorta xidmətləri göstərir.
