Bakı. Trend:
Göyçay Rayon Polis Şöbəsinin Dövlət Yol Polisi Bölməsinin əməkdaşları tərəfindən həyata keçirilən profilaktik tədbirlər zamanı narkotiklərin təsiri altında avtomobil idarə edən sürücülər saxlanılıb.
Trend-in Daxili İşlər Nazirliyinin Mətbuat Xidmətinin Şəki regional qrupuna istinadən verdiyi məlumata görə, "VAZ 2104" markalı avtomobilin sürücüsü Elçin Abdullayev və "VAZ 2106" markalı avtomobilin sürücüsü Cavid Yusifov yol hərəkəti qaydalarını pozduqları üçün onlara "saxla" işarəsi verilib.
Sürücülərin narkotik vasitə qəbul etdiklərinə dair şübhə yarandığından, onlar tibbi müayinədən keçirilib və nəticədə hər iki sürücünün marixuana istifadə etdiyi müəyyən edilib. Bu şəxslər barəsində toplanan materiallar baxılması üçün məhkəməyə göndərilib.
