Gürcüstanda Azərbaycan məktəblərinin bağlanması nəticəsində 5 minə yaxın müəllim işsiz qalacaq
Azərbaycan, Bakı / Trend müxbir S.İlhamqızı/ Gürcüstanda Azərbaycan məktəblərinin bağlanması və birləşdirilməsinə yönələn təhsil islahatları nəticəsində 5 minə yaxın müəllim işsiz qala bilər. Bu barədə Gürcüstanda fəaliyyət göstərən "Qeyrət" Xalq Hərəkatının həmtəsisçisi Zümrüd Qurbanov məlumat verib.
O bildirib ki, Gürcüstanda 167 Azərbaycan məktəbi var və aparılan islahatlar nəticəsində onlardan yüzünün belə qalmayacağı ehtimal olunur. Gürcüstanda təhsil haqqında yeni qanun müzakirəyə çıxarılır, bu isə Azərbaycan məktəblərinin ya tamam ləğv olunmasına, ya da azalmasına gətirib çıxaracaq. Qurbanov deyib ki, bu, proses artıq başlayıb və Azərbaycan məktəblərinin iki mərhələdə bağlanması prosesi gedir. Məktəblərin birləşdirilməsi adı altında bağlanması nəticəsində yüzlərlə azərbaycanlı uşaq qışın soyuğında, qarda uzaq yol qət edib digər məktəblərə getmək məcburiyyətində qalacaq.
Bundan başqa, Azərbaycan məktəblərində gürcü dilinin tədrisinin artırılması, Azərbaycan dilinin isə sıxışdırılması, sıradan çıxarılması prosesi gedir. Saxlanılan məktəblərdə bütün fənlər gürcü dilində keçiləcək, yalnız Azərbaycan dili və ədəbiyyatı ana dilində olacaq. Qurbanovun sözlərinə görə, 167 Azərbaycan məktəbi direktorlarının arasında attestasiya imtahanından keçmək üçün ərizə verənlərdən yalnız 7 nəfəri testdən keçə bilib.
