Azərbaycan, Bakı / Trend müxbir K. Zərbalıyeva/ Gürcüstanda cəza çəkən 40-a yaxın Azərbaycan vətəndaşının verilməsi ilə bağlı qonşu dövlətin Ədliyyə Nazirliyinə müraciət olunub. Ədliyyə Nazirliyinin Beynəlxalq Əməkdaşlıq İdarəsinin rəisi Zavər Qafarov Trend ə bildirib ki, məhkumların verilməsi üçün müvafiq tədbirlərin icrasına başlanılıb. Gürcüstanda cəza çəkən məhkumların Azərbaycana verilməsi üçün Ombudsman Elmira Süleymanova, Azərbaycanın Gürcüstandakı səfiri, məhkumlar və onların ailələri tərəfindən Ədliyyə Nazirliyinə müraciət edib.
Qafarovun sözlərinə görə, Azərbaycanda 100-dən artıq Gürcüstan vətəndaşı cəza çəkir. Onlar vətəndaşı olduğu ölkəyə verilməsi barədə müraciət edərsə, qonşu dövlətlə imzalanmış sənədlər və hər iki dövlətin qoşulduğu konvensiyalar çərçivəsində bu proses həyata keçiriləcək.
