Bakı. Trend:
"Baku Steel Company" QSC (BSC və ya qrup) şirkətin bütün proseslərinin mərkəzi idarəetməsi və rəqəmsallaşması sahəsində daha bir əhəmiyyətli addım atır.
Belə ki, BSC bütün qrup üzrə biznes proseslərin yenidən yazılması və qiymətləndirilməsi layihəsini uğurla başa çatdırıb və növbəti mərhələ olaraq, “SAP SE”-nin ən innovativ ERP (Enterprise Resource Planning – Müəssisə Resurslarının Planlaşdırılması) sistemi olan SAP S/4HANA kompleks həllini tətbiq etməyi nəzərdə tutur.
Bu sistem maliyyə, satınalma və təchizat, istehsalatın planlaşdırılması, satış, logistika, personalın idarə edilməsi proseslərini tam şəkildə əhatə edəcək. BSC, SAP S/4HANA sisteminin potensialından istifadə edərək, səmərəliliyi yüksəltməyi, artan bazar tələbatına qarşı çevikliyi qorumağı və biznes əməliyyatlarında inqilabi yeniliklər etməyi hədəfləyir.
Şirkət SAP S/4HANA kompleks sisteminin tətbiqi ilə bağlı yerli və xarici vendorlar üçün tender mərhələsinə başlayır. Bu mərhələ sözügedən layihəni icra etmək üçün potensial şirkətlərdən təkliflərin qəbul ediləcəyi seçim prosesinin əsas mərhələsidir.
Tender mərhələsində BSC öz strateji məqsədlərinə uyğun, metallurgiya sənayesində və ümumilikdə zəngin təcrübəyə malik, Azərbaycan Respublikasının qanunvericiliyi və beynəlxalq standartların tələblərinə uyğun, SAP standartları əsasında çalışan tərəfdaş müəyyən etməyi planlaşdırır. BSC, SAP S/4HANA sisteminin tətbiqi layihəsində, təkcə texniki bacarıqlara malik deyil, həmçinin rəqəmsal transformasiya və biznesin inkişafı sahələrində öz təcrübə və baxışlarını bölüşən tərəfdaş seçməyi düşünür.
SAP S/4HANA sisteminin tətbiqi ilə bağlı açıq tenderdə iştirak etmək istəyən şirkətlər BSC-nin Satınalmalar və təchizat Departamentinin [email protected] elektron poçt ünvanına və ya yazılı şəkildə şirkətin Bakı şəhəri, Mir Cəlal küç., 15 (Dərnəgül şosesi) ünvanında yerləşən Baş ofisinə müraciət ünvanlaya bilərlər.
Müraciətin son tarixi 05 aprel 2024-cü il saat 18:00-dır.
Daha ətraflı məlumatı bu keçiddən əldə etmək mümkündür.