Milan. Trend:
Bu gün qlobal iqtisadiyyatın üzləşdiyi əsas problem ticarət əlaqələrinin pozulması deyil, qeyri-müəyyənlikdir.
Trend xəbər verir ki, bunu Beynəlxalq Valyuta Fondunun (BVF) Asiya və Sakit Okean Departamentinin direktor müavini Tomas Helblinq bu gün Milanda keçirilən AİB-in 58-ci İllik Toplantısında “Qloballaşma – davamlı inkişafın hərəkətverici qüvvəsi kimi” adlı sessiyada çıxışı zamanı deyib.
"Həqiqi ticarət şoku nisbətən kiçik olub. Hazırda daha böyük şok, yəqin ki, investisiya və istehlak xərclərini geri çəkən qeyri-müəyyənlik şokudur", - o bildirib.
Bu vəziyyətə cavab olaraq o, risklərin effektiv idarə edilməsinin və makroiqtisadi hazırlığın vacibliyini vurğulayıb: “Bizim mesajımız risklərin idarə edilməsidir və ya bəzən dedikləri kimi “evinizi qaydasında saxlayın”. Bu, təkcə ayrı-ayrı şirkətlər səviyyəsində deyil, bütün iqtisadiyyatda hazırlıq və çeviklik tələb edir”.
Helblinq hökumətləri zərurət yarandıqda tez reaksiya verməyə və məqsədyönlü tədbirlər həyata keçirməyə imkan verəcək fiskal buferlər yaratmağa və saxlamağa çağırıb.
"Çevik valyuta məzənnəsi maliyyə turbulentliyinin olmadığı bir şəraitdə amortizator rolunu oynayır. Bu, həmçinin dəyişən ticarət axınlarına, biliklərin ötürülməsinə və beynəlxalq əmək bölgüsünə uyğunlaşmanı asanlaşdırır", - o bildirib.