Bakı. Trend:
Asiya İnfrastruktur İnvestisiya Bankı (AİİB) Bakı Metropoliteninin genişləndirilməsi layihəsinin həyata keçirilməsi üçün 180 milyon ABŞ dolları məbləğində kreditin ayrılmasını təsdiqləyib.
Trend bu barədə AİİB-ə istinadən xəbər verir.
“Layihənin məqsədi Bakı Metropolitenində xidmətin etibarlılığının artırılması, texniki xidmətin səmərəliliyinin və istismar təhlükəsizliyinin yüksəldilməsi, habelə “Dərnəgül” və “Xocəsən” depolarının tikintisi və təchizatı hesabına metro sisteminin genişləndirilməsi üçün şəraitin yaradılması, ayrı-ayrı stansiyalarda təhlükəsizlik, ekoloji və sosial dayanıqlılıq göstəricilərinin yaxşılaşdırılmasıdır", - deyə bankdan qeyd edilib.
Məlumatda bildirilir ki, Bakı Metropoliteninin genişləndirilməsi layihəsi infrastrukturun inkişafını və texniki dəstəyi əhatə edən iki əsas istiqamət üzrə həyata keçiriləcək.
Qeyd olunur ki, əlavə olaraq, Yaşıl xətt üzrə fəaliyyət göstərən
on stansiyanın ekoloji, sosial və istismar standartlarının, eləcə
də təhlükəsizlik səviyyəsinin artırılması məqsədilə
modernləşdirilməsi planlaşdırılır.
Vurğulanır ki, ikinci komponent texniki və məsləhətçi xidmətləri
əhatə edir:
“Bura layihənin hazırlanmasının müşayiəti, layihə həllərinin
ekspertizası, tikinti işlərinə nəzarət, ekoloji və sosial təsirin
qiymətləndirilməsi, həmçinin proqramın bütün mərhələlərinin
icrasına dəstək daxildir.
Layihə Bakı Metropoliteninin inkişafı üzrə dövlət strategiyasının
əsas elementi kimi qiymətləndirilir və hökumətin prioritetləri
sırasına daxildir”.
Bankın məlumatına görə, iki yeni deponun yaradılması qatarların xidmət göstərilməsi və bütün şəbəkənin dayanıqlı fəaliyyəti üçün zəruri bazanı təmin edəcək:
“Bu, mövcud infrastruktur məhdudiyyətlərini aradan qaldırmağa, xüsusilə “28 May” stansiyasında Qırmızı və Yaşıl xətlərin ayrılmasına imkan verəcək ki, bu da daşımaların etibarlılığını artıracaq və metronun buraxılış qabiliyyətini yüksəldəcək.
Təşəbbüsün Yaşıl xəttin gələcək genişləndirilməsi və hərəkətli heyətin yenilənməsi üçün müasir texniki, ekoloji və idarəetmə standartlarının əsasını qoyacağı gözlənilir. Əlavə olaraq, şəbəkənin inkişafı Bənövşəyi xəttin paralel şəkildə genişləndirilməsi ilə dəstəklənəcək”, – deyə bank məlumat verir.