Bakı. Trend:
İslam İnkişaf Bankı (İİB və ya IsDB) ilə Ələt Azad İqtisadi Zonası (ƏAİZ və ya AFEZ) arasında əməkdaşlıq perspektivləri müzakirə olunub.
Bu barədə ƏAİZ məlumat yayıb.
Məlumata əsasən, İslam İnkişaf Bankının (IsDB) nümayəndə heyəti Ələt Azad İqtisadi Zonasına (AFEZ) səfər edib.
Görüş zamanı AFEZ-in İdarə Heyətinin sədri Valeh Ələsgərov Zonanı regionda mühüm sənaye, logistika və investisiya mərkəzi kimi səciyyələndirərək onun strateji rolu barədə geniş təqdimatla çıxış edib.
Nümayəndə heyətinə Zonanın ərazisində həyata keçirilən genişmiqyaslı infrastruktur işləri, o cümlədən nəqliyyat əlaqələrinin inkişafı, kommunal şəbəkələrin, mühəndis sistemlərinin və müasir sənaye obyektlərinin yaradılması barədə məlumat verilib.
Səfər çərçivəsində tərəflər gələcək əməkdaşlıq perspektivləri barədə fikir mübadiləsi aparıblar. Hər iki tərəf əməkdaşlığın gücləndirilməsinin və davamlı iqtisadi inkişafın təşviqi, eləcə də uzunmüddətli investisiyaların cəlb edilməsi məqsədilə qarşılıqlı faydalı əməkdaşlıq imkanlarının araşdırılmasının vacibliyini vurğulayıb.
ƏAİZ-in fəaliyyətinin əsas istiqamətlərindən biri yüksək əlavə dəyər yaradan və ixracyönümlü istehsal müəssisələrinin yaradılması və inkişafı üçün investorların ehtiyaclarına uyğun biznes mühitinin formalaşdırılmasıdır. Zonanın fəaliyyət konsepsiyası investorlar üçün fiskal və qeyri-fiskal təşviqlərin, müasir infrastrukturun və ayrıca hüquqi və tənzimləyici çərçivənin tətbiqini nəzərdə tutur.
ƏAİZ-in qarşıya qoyduğu məqsədlər Azərbaycanın bilik və innovasiyalara əsaslanan, beynəlxalq rəqabət qabiliyyətli və şaxələndirilmiş iqtisadiyyatının inkişafına töhfə verməklə bağlıdır. Bu çərçivədə yüksək əlavə dəyər yaradan, ixracyönümlü istehsalın genişləndirilməsi, müasir enerji, nəqliyyat və logistika infrastrukturundan istifadə imkanlarının artırılması prioritet istiqamətlər sırasında yer alır.
ƏAİZ, həmçinin yerli sahibkarlıq subyektlərinin yeni biznes yanaşmaları və texnologiyalarından istifadəsinin genişləndirilməsini, innovativ müəssisələrin inkişafını və iqtisadiyyatda əlavə dəyərin yaradılmasını hədəfləyir.
Görüşdə qeyd olunan istiqamətlər IsDB ilə ƏAİZ arasında gələcək əməkdaşlıq üçün mümkün sahələrin müəyyənləşdirilməsi baxımından müzakirə edilib.
