Azərbaycan, Lənkəran / Trend müxbir P.Əliyeva/ Lənkəran rayonunda daşınmaz əmlakda alıcılıq qabiliyyəti ötən ilin müvafiq dövrü ilə müqayisədə 30 faiz aşağı düşüb. Lənkəranda daşınmaz əmlakın alqı-satqısı ilə məşğul olan "Elnur" MMC-nin direktoru Mirzə Əliyev çərşənbə günü Trend ə bildirib ki, mənzillərin alınmasında alıcılıq qabiliyyətinin aşağı düşməsinə səbəb Rusiyada yaşayan azərbaycanlıların bu il Lənkərana az gəlməsi olub. Digər tərəfdən alıcılar 2008-cı ildə ipoteka kreditlərinin təkrar verilməsini gözlədiklərindən, nəğd pulla mənzillərin alınmasına üstünlük vermirlər.
İyul ayında Azərbaycan İpoteka Fondu maliyyə çatışmazlığı səbəbindən ipoteka kreditinin verilməsini dayandırıb.Azərbaycan dövlət budcəsindən fonda 35 mln. manat vəsait ayrılıb.
Əliyevin sözlərinə görə, alıcılıq qabiliyyəti düşdüyündən mənzillərin də qiymətində enmə müşahidə olunur. Lənkəranın mikrorayonunda bir otaqlı mənzildə qiymət 2000 dollar (16-18 min dollar), iki otaqlıda 5000 dollar (25-28 min dollar), üç otaqlı mənzillərdə isə 6000 dollar (29-33 min dollar) aşağı düşüb. Şəhərin mərkəzindəki mənzillərdə isə qiymətlər analoji olaraq 10-15 min dollar aşağı düşüb. Mərkəzdə torpağın qiymətində isə 100 faiz artım müşahidə olunur. Ötən ilin müvafiq dövründə şəhərin mərkəzində torpağın bir sotu 25-30 min dollara satılırdısa, indi bu qiymət 50-60 min dollara qalxıb.
Lənkəran paytaxt Bakıdan 270 kilometr cənubda yerləşir.