Azərbaycan, Bakı, 16 yanvar/ " müxbir İ.Xəlilova/ Azərbaycan hökuməti 2008-ci ildə kiçik özəlləşdirməni tamamilə başa çatdırmağı planlaşdırır. Hazırda bu prosesi sürətləndirmək üçün tədbirlər həyata keçirlir. Bu barədə Dövlət Əmlakının idarə edilməsi üzrə Dövlət Komitəsinin sədri Kərəm Həsənov məlumat verib.
2007-ci il ərzidnə 2150 kiçik dövlət müəssisəsi və obyekti, həmçinin, obyektlərin yerləşdiyi 670 torpaq sahəsi özəlləşdirilib.
Kiçik özəlləşdirməni sürətləndirmək üçün, özəlləşdirilməsi birinci Dövlət Əmlakının özəlləşdirilməsi Dövlət Proqramı (DƏÖDP-1) çərçivəsində həyata keçirilən kiçik müəssisələrin ötən ildən dövlətdə qalan səhmləri investisiya müsabiqələri vasitəsilə satışa çıxarılır.
Həsənovun sözlərinə görə, dövlət əmlakının icarəyə verilməsi də kiçik özəlləşdirmənin bir hissəsidir və bu istiqamətdə fəal işlər aparılır. Hesabat dövrü ərzində 1350 daşınmaz dövlət əmlakı hüquqi və fiziki şəxslərə icarəyə verilib. Qeyri- yaşayış sahələrinin, özəlləşdirilən müəssisələrin və obyektlərin altındakı torpaq sahələrinin icarəyə verilməsi nəticəsində, yanvar-dekabrda dövlət büdcəsinə 3,1 mln. manat daxil olub ki, bu da illik proqnozların 10% artıqlaması ilə yerinə yetirilməsi deməkdir.
Dövlət Komitəsi icarə haqlarının vaxtında və tam ödənilməsi üçün daim iş aparır. Təkcə ötən il ərzində1400 icarəçiyə borcların ödənilməsi haqqında xəbərdarlıq göndərilib. 700 borcluya münasibətdə məhkəmə orqanlarında iddia qaldırılıb və bundan sonra icarə üzrə dövlət büdcəsinə olan borcların ödənilməsi təmin edilib.