Azərbaycan, Bakı, 21 aprel / Trend / "AZAL" Dövlət Konserni may ayının əvvəlində Fransa istehsalı olan ATR tipli üçüncü təyyarəni əldə edəcək. Bu barədə bazar ertəsi Dövlət Konserni Baş direktorunun müavini Sabir İlyasov bildirib.
Ötən il Konsern bu istehsalçıdan iki hava gəmisi almıb. Müqavilədə göstərilən digər hava gəmiləri bu ilin avqust ayına qədər ölkəyə gətiriləcək. Bu təyyarələr əsasən daxili reyslər və regional marşrutlar üçün istifadə olunacaq.
"AZAL" ilk növbədə Fransanın ATR şirkətinin yeni təyyarələrini Naxçıvan, Gəncə, Lənkəran və Zaqatala aeroportlarında sərnişin daşımaları üçün istifadə etmək niyyətindədir.
Dövlət Konserni ATR tipli təyyarə istehsal edən Fransa aviaqayırma müəssisəsinə iki ATR - 42-500S və dörd ATR - 72-500S təyyarəsinin alınmasına dair sifariş verib. Müqavilənin ümumi dəyəri təxminən 97,2 mln. dollardır. Bunlar 50-70 yerlik kiçik təyyarələr olacaq.
Fransa şrukəti nümayəndələrinin əvvəllər qeyd etdiyinə görə, altı yeni təyyarənin cəlb edilməsi, Azərbaycana "Antonov" və "Tupolev" markalarını dəyişməklə parkını yeniləmək və yeni regional marşrutlar yaratmaq imkanı verəcək.