Azərbaycan, Bakı, 25 oktyabr / Trend , müxbir İ.Xəlilova/ "Azərbaycan Beynəlxalq Bankı (ABB) şəxsi vəsaitləri hesabına ipoteka kreditləşməsinə başlamaq niyyətindədir və bankın 2009-cu il üçün büdcəsində bu məqsədlərə 10 mln. manat ayırmaq planlaşdırılır", - ABB İdarə Heyətinin sədri Cahangir Hacıyev şənbə günü bildirib.
"Dünya maliyyə böhranı ilə əlaqədar bizim uzunmüddətli vəsaitlərin cəlb edilməsi və onların yerləşdirilməsi ilə bağlı problemlərimiz ola bilər. Lakin ABB bu vəsaitlər cəlb edilmədən də şəxsi vəsaitlərini ipotekaya ayırmağa hazırdır", - Hacıyev bildirib.
Hazırda xüsusi ipoteka proqramı hazırlanır, ipoteka kreditləşməsinin şərtləri dəqiqləşdirilir. Bu prosesi ilin sonunadək başa çatdırmaq planlaşdırılır. Bunun üçün xüsusi qrup yaradılıb.
ABB Azərbaycan Milli Bankı yanında fəaliyyət göstərən Azərbaycan İpoteka Fondunun üzvüdür. Lakin o, şəxsi vəsaitləri hesabına ipoteka kreditləşməsinə hələ də başlamayıb. Ötən ilin yayında Azərbaycan İpoteka Fondu (AİF) kreditlərin verilməsini dayandırıb. AİF-in səlahiyyətli banklarının təkrarmaliyyələşdirmə dərəcəsi illik altı faiz təşkil edib. İpoteka kreditləri üzrə maksimal dərəcə isə illik 12 faiz səviyyəsində müəyyən edilib.
Azərbaycan Milli Bankının hazırladığı Dövlət İpoteka Proqramı 2006-cı il martın 1-də fəaliyyətə başlayıb.
Müəlliflə əlaqə saxlamaq üçün elektron ünvan: [email protected]
