Azərbaycan, Bakı, 17 fevral / Trend , müxbir E.İsmayılov/ Bakı metropoliteni sutkada orta hesabla təqribən 550-560 min sərnişin daşıyır. Bu barədə çərşənbə axşamı metropolitendə işlərə yaxın mənbə bildirib.
Onun sözlərinə görə, adi günlər Bakı metrosu 700 min nəfərədək sərnişin daşıyır.
Ötən il gərginliyin azaldılması məqsədi ilə metropoliten qatarların yeni hərəkət rejiminə keçib. Bu rejim pik saatlarında qatarların hərəkətinin müvəqqəti intervalının iki dəqiqəyədək (hər iki istiqamətdə saatda 30 qatar) azaldılmasını nəzərdə tutur. Metro stansiyalarında sərnişinlərin fəallığının artması elektron keçid kartlarından istifadə tezliyi ilə müəyyən olunur. Pik vaxtınadək və ondan sonra qatarların hərəkətinin müvəqqəti intervalı 2,5 dəqiqəyədək (saatda 24 qatar), minimal sərnişin fəallığı zamanı isə üç dəqiqəyədək endirilir (saatda 20 qatar).
Əvvəllər Bakı metrosu iki rejimdə işləyirdi. Qış dövründə qatarlar arasında hərəkət intervalı 2,5 dəqiqə, yay dövründə isə üç dəqiqə təşkil edirdi.
Bakı metropoliteni İçəri Şəhər stansiyasından Nəriman Nərimanov stansiyasınadək üç aralıq stansiya ilə 1967-ci ildən fəaliyyət göstərir. Metropolitenin yeddi stansiyası (İçəri Şəhər, Sahil, 28 may, Cəfər Cabbarlı, Xətai, Nizami, Elmlər Akademiyası) dərin enişli, Bakmil yerüstü, qalanları isə sütunlu, dayaz enişlidir (cəmi 20 stansiya).
Məqalə müəllifi ilə əlaqə ünvanı: [email protected]
