Azərbaycan, Bakı, 11 mart / Trend , müxbir S.Babayeva /
"Hazırda Azərbaycanda anti-böhran tədbirləri üzrə hazırlanan dövlət proqramı şübhəsiz ki, ölkədə sahibkarlıq fəaliyyətinə müsbət təsir edəcək", - çərşənbə günü Azərbaycan Milli Sahibkarlar Konfederasiyasının (AMSK) başçısı Ələkbər Məmmədov deyib.
"Bu gün hansı məsələlərin orada öz əksini tapacağı və onların hadisələrin gedişinə necə təsir edəcəyi barədə əminliklə heç nə söyləmək olmaz, çünki proqram hələ hazırlanma mərhələsindədir. Ancaq proqramın hazırlanması müsbət haldır", - Məmmədov deyib.
Onun sözlərinə görə, AMSK hökumətə dünya maliyyə böhranının təsirinin azaldılması üzrə öz təkliflərini təqdim edib. Təkliflər özündə sahibkarlığa dəstək milli fondundan ayrılan vəsaitlərin həcminin hazırki 120 milyon manatdan 1 milyard manata qaldırılması, kreditlərin verilməsi şərtlərinə yenidən baxılması, sosial ödəmələrin hazırkı 25 (22+3) faizdən 17 faizə qədər azaldılması kimi məsələləri ehtiva edir.
Konfederasiyanın təkliflərinə, həmçinin dövlət alqısı sisteminin keçirilməsində yerli sahibkarların fəallaşdırılması, eləcə də yerli istehsal məhsullarının maya dəyərinin azaldılması üçün enerji daşıyıcılarının qiymətinin 50 faiz endirilməsi və bununla da ölkənin aqrar sektorunun inkişafının dəstəklənməsi də daxildir.
AMSK sədri hesab edir ki, bir çox məqamlara dövlət proqramının ilkin müzakirəsi zamanı aydınlıq gələcək.
Məqalə müəllifi ilə əlaqə ünvanı: [email protected]