Azərbaycan, Bakı, 08 iyun / Trend /
Azərbaycan iyunun 9-10-da İstanbulda "Bakı-Tbilisi-Qars Trans-Avropa dəmiryol şəbəkəsinin əsas hissəsi kimi" mövzusunda prezentasiya təşkil edəcək, Azərbaycanın Nəqliyyat Nazirliyinin məlumatında deyilir. Prezentasiya "Avropa və Asiya arasında dəmiryol nəqliyyatı" mövzusunda seminarın keçirilməsi zamanı təşkil ediləcək.
Seminar Beynəlxalq Dəmiryol Yükdaşımaları dövlətlərarası təşkilatı, BMT-nin İqtisadi Əməkdaşlıq təşkilatları və Türkiyənin Dövlət Dəmiryolunun təşkilatçılığı ilə keçiriləcək.
Seminarda beynəlxalq dəmiryol yük və sərnişin daşımaları sahəsində qanunvericilik məsələləri, dəmiryol lokomotivləri və vaqonlarının alınmasının maliyyələşdirilməsi, sərhəd buraxılış prosedurlarının sadələşdirilməsi və digər məsələlər müzakirə ediləcək.
Azərbaycan seminarda Nəqliyyat Nazirliyi və ölkənin dəmiryol nümayəndələri tərəfindən təmsil olunacaq.
Məqalə müəllifi ilə əlaqə ünvanı: [email protected]
