Azərbaycan, Bakı, 12 iyun / Trend , müxbir E.İsmayılov /
Bu gündən etibarən Bakıda işləyən 162, 219, 306 və 309 №-li marşrutlara Cənubi Koreyanın DAEWOO şirkətinin istehsalı olan 70 yeni iritutumlu avtobus buraxılıb. Bu barədə cümə günü Azərbaycan Nəqliyyat Nazirliyindəki mənbə bildirib. Yeni avtobusların xəttə buraxılması şəhərin nəqliyyat sisteminin kiçik və ortatutumlu avtobuslardan iritutumlu avtobuslara keçidi çərçivəsində həyata keçirilir.
Mənbənin bildirdiyinə görə, 89 yeni avtobus artıq 14, 54, 70, 125, 137, 169, 285 və 325 №-li marşrutlara buraxılıb. Bakıda ümumilikdə bütün marşrutlar üzrə 1000 iritutumlu avtobus buraxmaq planlaşdırılır.
Hazırda ortatutumlu avtobuslar Bakının mərkəzi küçələri ilə hərəkət edir. Bir neçə gün əvvəl Nəqliyyat Nazirliyi yanında "Avtonəqliyyatservis" Departamenti ortatutumlu avtobusların sayını azaldaraq, yeni alınmış iritutumlu avtobusları marşruta buraxıb. Kiçiktutumlu avtobuslar artıq şəhərin mərkəzində istismardan çıxarılıb.
"İritutumlu avtobusların marşrutlara buraxılması tədricən həyata keçiriləcək, hələ ki, ortatutumlu avtobuslar şəhərin küçələri ilə hərəkət edə biləcək", - mənbə bildirib. Kiçiktutumlu avtobuslar hələ ki, şəhərin kənarlarında işləyirlər.
Əvvəllər Nəqliyyat Nazirliyi 200-ə yaxın DAEWOO şirkətinin iritutumlu avtobuslarını alıb.
Kiçik avtobusların orta və iritutumlu avtobuslarla əvəz olunması bu ilin sonunadək başa çatdırılacaq, mənbə bildirib.
Məqalə müəllifi ilə əlaqə ünvanı: [email protected]
