...

Azərbaycanda uşaq əməyindən istifadənin aradan qaldırılması üzrə tədbirlər hazırlanır

Biznes və iqtisadiyyat xəbərləri Materials 1 İyul 2009 11:43 (UTC +04:00)

Azərbaycan, Bakı, 30 iyun / Trend , müxbir U.ismayılova /

Azərbaycanda uşaq əməyindən istifadə edən müəssisə sahiblərinə qarşı tədbirlər gücləndirilib. Bu barədə çərşənbə axşamı Azərbaycanın əmək və əhalinin sosial müdafiəsi nazirinin müavini Natiq Məmmədov bildirib.   

"Beynəlxalq Əmək Təşkilatının məlumatına əsasən, dünyada hər il 128 milyon uşaq əməyə cəlb olunur. Azərbaycanda Əmək Nazirliyi müvafiq nazirliklər, dövlət  və qeyri-hökumət təşkilatları ilə birlikdə bu vacib problemin aradan qaldırılması üçün ciddi işlər həyata keçirir", - deyə nazir müavini bildirib.

Onun sözlərinə əsasən, Əmək Nazirliyi uşaq əməyinin ləğvi üzrə tədbirləri hazırlamaq və hökumətə təqdim etmək niyyətindədir. Uşaqların əməyə cəlb olunması gələcəkdə onların səhhətinə, təhsil almasına və şəxsiyyət kimi formalaşmasına mənfi təsir göstərə bilər.    

Məmmədovun sözlərinə əsasən, Azərbaycanda uşaq əməyindən istifadə yay mövsümündə, xüsusilə tikinti və turizm obyektlərindəki xidmətlər sahəsində aktualdır. Uşaq əməyindən istifadə ölkə regionlarında kənd təsərrüfatı sahəsində də müşahidə edilir.

Azərbaycanda işləmək hüququna 15 yaşından böyük uşaqlar malikdir. Lakin iş onların səhhəti üçün təhlükəli olmamalı, təhsilinə və normal həyat tərzi keçirməsinə mane olmamalıdır.

Nazir müavini hesab edir ki, uşaq əməyindən istifadənin aradan qaldırılmasına Əmək Nazirliyinin təklikdə gücü çatmır, bu prosesdə bütün cəmiyyət iştirak etməlidir. Uşaq əməyindən istifadə edən müəssisə sahibləri arasında maarifləndirmə işlərinin keçirilməsi mütləqdir.

Məmmədov bildirib ki, Azərbaycanda birinci rübdə uşaq əməyindən istifadə üzrə 16 fakt aşkar olunub. Bunun nəticəsində müəssisə sahiblərinə inzibati qayda pozuntuları məcəlləsinə müvafiq olaraq müəyyən sanksiyalar tətbiq edilib. 

Məqalə müəllifi ilə əlaqə ünvanı: [email protected]

Xəbər lenti

Xəbər lenti