Azərbaycan, Bakı, 27 iyul / Trend , müxbir Ü.İsmayılova /
"Azərbaycanın Standartlaşdırma, Metrologiya və Patent üzrə Dövlət Komitəsi daxil olan şikayətlərə əsaslanaraq, Fransanın "Perrier" suyu və Avstriyanın "Granini" şirələrinin ölkə ərazisində istehsal və realizəsi üzrə monitorinq aparıb", - komitənin bazar ertəsi yaydığı məlumatda deyilir.
Monitorinqlər Bakının Binəqədi, Yasamal, Nəsimi, Nərimanov, Səbail, Sabunçu, Nizami və Xətai rayonlarındakı 52 şadlıq evində keçirilib.
Monitorinqlər nəticəsində məlum olub ki, "Kleopatra" və "Tac Mahal" şadlıq evlərində müştərilərə Rusiya, Türkiyə və Fransa istehsalçılarının adı altında saxta "Swell", "Aroma", "Perrier" şirələri verilir.
Bütün hallarda komitə şadlıq evlərinə belə içkilərin satışına qadağa tələbini qoyub.
Fakturaların tədqiqatı zamanı komitə əməkdaşları müəyyən edib ki, saxta məhsullar "Dasqin M" QSC-də istehsal edilir. Hazırda şirkətin dəqiq ünvanı axtarılır və saxta məhsullar istehsal edən digər istehsalçıların müəyyən edilməsi üzrə işlər davam etdirilir.
Azərbaycanın Standartlaşdırma, Metrologiya və Patent üzrə Dövlət Komitəsi saxta meyvə şirələri və xarici istehsallı mineral suların istehsalı faktları üzrə monitorinqlərə iyulun 16-da başlayıb.
Məqalə müəllifi ilə əlaqə ünvanı: [email protected]