Azərbaycan, Bakı, 19 avqust / Trend , müxbir Ü.İsmayılova /
2009-cu ilin sonuna kimi Azərbaycanın sığorta bazarında fəallığın 20 faiz səviyyəsində azalması gözlənilir, çərşənbə günü Azərbaycanın Sığortaçılar Assosiasiyasının İdarə Heyətinin üzvü Azər Əliyev bildirib.
"Birinci yarımilin yekunlarına əsasən, ölkənin sığorta bazarı 17 faiz azalıb", - Əliyev bildirib.
Onun sözlərinə əsasən, bir çox şirkət yaranan vəziyyətdən çıxış yolu axtarır, bəziləri yeni sığorta məhsulları təklif etməyə başlayıb, bəziləri isə sığorta agentlərinin siyahısını genişləndirir.
"Sığorta bazarındakı vəziyyət çox ağırdır, lakin bazar fəaliyyətini dayandırmayıb, az da olsa artır və daha dözümlü şirkətlər öz biznesini və gələcək inkişafını davam etdirəcək", - Əliyev bildirib.
Onun fikrincə, ilin yekunları üzrə şirkətlərin yığımı təxminən 160 milyon manat təşkil edir.
Azərbaycanda 28 sığorta və bir təkrarsığorta şirkəti fəaliyyət göstərir. 2008-ci ildə fəaliyyət yekunlarına əsasən, şirkətlər 179,26 milyon manat haqq yığıb, ödəmələri isə 49,81 milyon manat təşkil edib. Birinci yarımilin yekunlarına əsasən, yığımlar 79,89 milyon manat, ödənişlər isə 24,65 milyon manat təşkil edib.
Avqustun 19-na olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: capital@trend
