Azərbaycan, Bakı, 21 oktyabr / Trend , müxbir Ü.İsmayılova/
Gələn il Azərbaycanda təqaüdlərin indeksləşdirilməsi aparılmaya bilər. Bu barədə Dövlət Sosial Müdafiə Fondunun (DSMF) rəhbəri Səlim Müslümov çərşənbə günü bildirib. "İndeksləşdirilmənin aparılmaması ilin əvvəlindən ölkədə müşahidə edilən deflyasiya ilə əlaqədardır", - Müslümov deyib.
Onun sözlərinə görə, ilin yekunlarına əsasən ölkədə inflyasiya dərəcəsi ilə bağlı vəziyyət dəyişməsə, indeksləşdirilmə aparılmayacaq.
2008-ci ilin yanvar ayında Prezident İlham Əliyev ötən il ərzində ölkədə inflyasiya dərəcəsini nəzərə almaqla təqaüdlərin sığorta və baza hissəsinin indeksləşdirilməsinə dair göstəriş verib. Göstərişə müvafiq olaraq, ölkənin hər bir vətəndaşının fərdi uçotunda toplanan təqaüd kapitalının da indeksləşdirilməsi aparılmalıdır.
DSMF-in məlumatına görə, Azərbaycanda 2008-ci ildə 547 min pensiyaçının təqaüdünün sığorta və baza hissəsi indeksləşdirilib. İndeksləşdirilmə nəticəsində pensiyanın sğorta hissəsinin orta artımı 6 manat təşkil edib. Beləliklə də bu dövrdə pensiya səviyyəsi 99 manat təşkil edib.
Azərbaycanda pensiyaların sığorta hissəsinin indeksləşdirilməsi üçün hər ay 3,2 milyon manata yaxın, hər il isə 38,5 milyon manata yaxın vəsait tələb olunur.
Dövlət Statistika Komitəsinin məlumatına görə, sentyabr ayında istehlak mallarının və xidmət tariflərinin qiymətləri 2009-cu ilin avqust ayı ilə müqayisədə 0,4 faiz ucuzlaşıb.
21 oktyabra olan rəsmi məzənnə 0,8031 AZN/USD təşkil edir.
Məqalə müəllifi ilə əlaqə ünvanı: [email protected]
