Azərbaycan, Bakı, 16 fevral / Trend , müxbir E.İsmayılov/
Bu ilin ikinci yarısında Azərbaycanın "SW Helicopter Services" MMC ABŞ-ın Sikorsky aviaşirkətinin istehsalı olan iki S-92 vertolyotu alacaq. Bu barədə MMC-nin baş direktoru Rövşən Əliyev çərşənbə axşamı bildirib.
"Bu vertolyotlar neft (dəniz) platformalarına uçuşlar həyata keçirmək üçün nəzərdə tutulub. Həmin vertolyotların istismara verilməsi bu ilin üçüncü-dördüncü rübünə planlaşdırılıb", - Əliyev deyib.
Onun sözlərinə görə, əvvəlcə həmin vertolyotların alınması üzrə sifariş "SW Helicopter Services"-in təsisçisi olan İnternational Handling Company Limited tərəfindən edilib.
Həmçinin 2010-cu il fevralın 1-dən "SW Helicopter Services" MMC və "ВР Exploration (Caspian Sea) Limited" aviasiya xidmətləri göstərmək üçün birgə işlərə başlayıb. Bu məqsədlə müvafiq müqavilə imzalanıb.
Hazırda "SW Helicopter Services" MMC bp şirkətinin baş podratçısıdır. Bununla əlaqədar olaraq MMC, bp və Kanadanın "CHC Global Operations Canada Inc." şirkəti müvafiq müqavilə imzalayıb.
"SW Helicopter Services" MMC Azərbaycan ərazisində aviasiya sahəsində fəaliyyət göstərən ən iri aviaşirkətdir. MMC 18 mart 2008-ci il tarixində hüquqi şəxs kimi qeydiyyatdan keçib və Dövlət Mülki Aviasiya Administrasiyasının verdiyi istismar haqqında şəhadətnamə və lisenziyaya malikdir.
Məqalə müəllifi ilə əlaqə ünvanı: [email protected]
