Bakı.Trend:
Yəməndən olan husilər strateji əhəmiyyət daşıyan Bab əl-Məndəb boğazının bağlaması ilə bağlı iddiaları təkzib edərək bildiriblər ki, aparılan dəniz əməliyyatları yalnız Səudiyyə Ərəbistanına qarşı məqsədli dəniz blokadası ilə məhdudlaşır.
Qrupun əsas sözçüsü Məhəmməd Əbdül Səlam "X" sosial şəbəkəsində paylaşdığı açıqlamada boğazın tam bağlanması ilə bağlı iddiaları rədd edib.
"Bab əl-Məndəb boğazının bağlanması barədə bəzi dairələrin yaydığı məlumatlar həqiqəti əks etdirmir", – deyə o yazıb.
Onun sözlərinə görə, dəniz blokadası yalnız Səudiyyə Ərəbistanına şamil olunur.
"Bu addım Səudiyyə Ərəbistanının Yəməni mühasirədə saxlamasına və Yəmən xalqının təhlükəsizliyini, suverenliyini və müstəqilliyini təmin edəcək ədalətli həll yolunu qəbul etməməsinə cavab olaraq atılıb", - deyə o bildirib.
