Azərbaycan, Bakı, 22 aprel /Trend, müxbir Ü.İsmayılova/
Azərbaycan Turizm Agentlikləri Assosiasiyası 2010-2014-cü illərdə turizmin inkişafı üzrə Dövlət Proqramının reallaşması çərçivəsində turizm obyektləri əməkdaşlarının ixtisaslarının artırılması üzrə tədbirlər keçirmək niyyətindədir. Bunu cümə axşamı assosiasiyanın rəhbəri Nahid Bağırov deyib.
"Treninqlərin ilkin mərhələsində turizm obyektlərinin əməkdaşları Mədəniyyət və Turizm Nazirliyi yanında Azərbaycan Turizm İnstitutunda nəzəri kurslar keçəcəklər", - Bağırov deyib.
Onun sözlərinə görə, ikinci mərhələdə treninq iştirakçıları özünün yüksək keyfiyyətli xidməti ilə məşhur olan Rusiya (Moskva) və Türkiyənin, əsasən, Antalyanın otel və mehmanxanalarında ikihəftəlik praktika keçəcəklər.
"Assosiasiya azərbaycanlı mütəxəssislər üçün praktiki məşğələlərin keçirilməsi məqsədilə Türkiyə və Rusiyanın turizm obyektləri ilə danışıqları başa çatdırıb", - Bağırov deyib.
Aprelin 6-da Azərbaycan Prezidenti İlham Əliyev 2010-2014-cü illərdə turizmin inkişafı üzrə Dövlət Proqramının təsdiq edilməsi haqqında sərəncam imzalayıb. "Proqram turizm sahəsində mövcud problemlərin həllinə xidmət edəcək və ölkədə turuzmin inkişafını daha da təmin edəcək", - Dövlət Proqramının mətnində deyilir.
Dövlət Proqramının başlıca məqsədi Azərbaycanda yüksək iqtisadi, sosial və ekoloji tələblərə cavab verən müasir turizm sahəsinin formalaşdırılması və onun ölkə iqtisadiyyatının əsas inkişaf dayaqlarından birinə çevrilməsinin təmin edilməsidir.
Dövlət Proqramında deyilir ki, bu məqsədə nail olunması aşağıdakı əsas vəzifələrin həllini nəzərdə tutur: ölkədə turizm infrastrukturunun yüksək beynəlxalq tələblər səviyyəsində qurulmasına istiqamətlənmiş məqsədyönlü fəaliyyətin həyata keçirilməsi; daxili və xarici investisiyaların turizm sahəsinə cəlb edilməsi məqsədi ilə bu sahədə təşviqləndirici investisiya və biznes-mühitin formalaşdırılması; turizm sahəsində qabaqcıl beynəlxalq təcrübədən istifadə edilməklə səmərəli dövlət tənzimlənməsi və idarə edilməsi mexanizmlərinin yaradılması; ölkənin turizm sahəsinin təqdim etdiyi xidmətlərin keyfiyyət səviyyəsinin beynəlxalq standartlara uyğunluğunun təmin edilməsi, dünya turizm xidmətləri bazarında ölkə turizminin rəqabət qabiliyyətinin artırılması.
Dövlət Proqramında nəzərdə tutulmuş tədbirlər dövlət büdcəsinin vəsaitləri, o cümlədən, dövlət büdcəsində Azərbaycan Mədəniyyət və Turizm Nazirliyi üçün nəzərdə tutulmuş vəsaitlər, habelə qanunvericilikdə nəzərdə tutulan digər mənbələr hesabına maliyyələşdirilir.