Azərbaycan, Bakı, 5 may /Trend, müxbir Ü.İsmayılova/
Azərbaycan Auditorlar Palatası ölkənin təsərrüfat subyektlərində auditor yoxlamalarının keçirilməsi səviyyəsindən narazıdır. Bu barədə palatanın rəhbəri Vahid Novruzov çərşənbə günü bildirib.
"2009-cu ildə təsərrüfat subyektlərinin fəaliyyətinin yekunları üzrə bu göstərici çox aşağı səviyyədədir", - Novruzov hesab edir.
Onun sözlərinə görə, palata ümid edir ki, 2010-cu ildən başlayaraq ölkədə beynəlxalq audit standartlarına keçidlə əlaqədar auditorların xidmətləri üzrə müraciətlərin sayı artacaq.
Bu məqsədlə, Novruzovun sözlərinə görə, palata qanunvericilik bazasının təkmilləşdirilməsi üzrə işləri davam etdirir, hazırda palatanın subyektlərin auditdən yayınması üzrə cərimələrin və inzibati sanksiyaların tətbiqinə dair Azərbaycanın İnzibati Xətalar Məcəlləsinə əlavələrin edilməsi barədə təklifinə ölkənin Nazirlər Kabinetində baxılır.
"Hazırda təklif bütün müvafiq dövlət strukturları ilə müzakirə olunur və biz onların yaxın vaxtlarda təsdiqlənəcəyinə ümid edirik", - Novruzov bildirib.
Növruzov cərimə sanksiyalarının həcmindən danışarkən bildirib ki, müzakirə olunan təkliflərə müvafiq olaraq cərimənin məbləği auditor müqaviləsinin dəyərindən az olmamalıdır. Bu da təsərrüfat subyektini auditor yoxlamalarından keçmək üçün məcbur etməyə imkan verir.
Azərbaycanda 2010-cu il yanvarın 1-dən beynəlxalq audit standartları tətbiq edilir.
Azərbaycan Auditorlar Palatası 1995-ci ilin sentyabrında təsis olunub və 1996-cı ilin aprelindən aktiv fəaliyyətə başlayıb. Azərbaycanda "Auditor fəaliyyəti haqqında" qanun 1994-cü ildə qəbul edilib.
Azərbaycanda mayın 4-nə olan vəziyyətə görə, 50 auditor şirkəti və 50 auditor-fizki şəxs fəaliyyət göstərir.