Аzərbaycan, Bakı, 30 iyun /Trend, müxbir E.İsmayılov/
Bu həftənin sonuna qədər "Azərbaycan Dəmir Yolları" QSC Kür çayında suyun səviyyəsinin artması nəticəsində mayın 9-da hərəkəti dayandırılan Bakı-Astara marşrutu üzrə qatarların hərəkətini bərpa edəcək. Bu barədə çərşənbə günü Azərbaycan Nəqliyyat Nazirliyindəki mənbə məlumat verib.
"Bərpa işləri hələ də davam etdirilir, lakin ola bilsin ki, bu həftənin sonuna qədər cənub istiqamətində qatarların hərəkətinin bərpası başa çatsın", - mənbə deyib.
Onun sözlərinə görə, cənub istiqamətində sürət limiti olmadan dəmiryol nəqliyyatının tam bərpası üçün hələ iki-üç ay lazım olacaq. "Qatarların tam hərəkəti üçün bir neçə ay ərzində işlərin aparılması vacibdir", - mənbə bildirib.
Ümumilikdə təmir-bərpa işləri çərçivəsində yolun 54-cü kilometrliyində133 metrlik körpünün zədələnmiş tağlarının dəyişdirilməsi, üst quruluş elementlərinin quraşdırılması, 23 km məsafədə torpaq yatağında yaranmış birtərəfli yatmaların ləğv olunması, hər birinin uzunluğu 10,5 metr, diametri 1,78 metr olan 6 ədəd metal borunun qoyulması nəzərdə tutulub.
Həmçinin, 38 kilometr uzunluğunda rabitə və 2 kilometr uzunluğunda siqnal kabellərinin və 8 kilometr məsafədə hava rabitə xəttinin yıxılmış ağac dirəklərinin dəyişdirilməsi həyata keçiriləcək.
Su səviyyəsinin artması ilə əlaqədar dəmir yolunun 15-ci kilometrində, Azadkənd-Salmanlı mənzilinin 19-cu, 21-ci (2 yerdə) və 24-cü kilometrlərində subasmanın qarşısını almaq və suyu digər istiqamətə ötürmək üçün dəmiryol yatağı beş yerdən yarılıb. Sonradan yarılan yol yatağı xeyli genişlənib, həmin istiqamətdə 23 kilometrə yaxın yolun torpaq yatağı çökməyə məruz qalıb.