Azərbaycan, Bakı, 9 iyul /Trend, müxbir Ü.İsmayılova/
"Aqrоlizinq" ASC mineral gübrə və pestisidlərin alınması üzrə tender elan edib. Cümə günü tender komissiyasının rəsmi mətbuatda çap olunmuş məlumatında deyilir.
Tenderin şərtlərinə görə, qalib "Aqrоlizinq"ə müqavilənin imzalanmasından sonrakı 90 gün ərzində mineral gübrə və pestisidlərin tenderdə nəzərdə tutulan bütün həcmini təqdim etməlidir. Nisbətən aşağı qiymət, yüksək keyfiyyət təklif edən, müqavilənin bəndlərinin vaxtında reallaşdırılması haqda zəmanət verən, eləcə də mineral gübrələr sahəsində servis xidmətləri haqda öhdəliklərə malik olan iddiaçılara üstünlük veriləcək.
Tender bir lotda keçiriləcək, tenderdə iştirakın dəyəri 1000 manat təşkil edir.
Tender proseduru avqustun 19-da "Aqrоlizinq" ASC-nin inzibati binasında keçiriləcək.
"Aqrоlizinq" ASC cins mal-qara üçün yem almaq üzrə də tender elan edib.
"Aqrоlizinq" ASC ölkənin 55 rayonunda xidmət məntəqələrinə malikdir. 2005-ci ildə fəaliyyətə başlayan şirkət bu günədək 8,817 min vahiddən çox aqrotexnika, eləcə də 745 taxılyığan kombayn, 2,25 min traktor, 132 ekskavator, 5,69 min ədəd müxtəlif kənd təsərrüfatı texnikası istismara verib.