Azərbaycan, Bakı, 12 avqust /Trend, müxbir İ.Xəlilova/
Azərbaycan Parlamenti payız sessiyasında "İnvestisiya fondları haqqında" qanun layihəsinin müzakirəsi gözlənilir. Bu qanunun qəbul edilməsi investisiya fondlarının inkişafında mühüm rol oynayacaq. Bu barədə Parlamentin istisadi siyasət komitəsinin sədri Ziyad Səmədzadə bildirib. Qanun layihəsi artıq Milli Məclisə təqdim olunub.
"Bu qanun layihəsi ölkədə investisiya fondlarının təşkili, idarə olunması və ləğvinin prinsiplərini, dövlət nəzarətinin iqtisadi və hüquqi əsaslarını və fondların fəaliyyətinin nizamlanmasını müəyyən edəcək", - Səmədzadə bildirib.
Onun sözlərinə görə, 1999-cu ildə qəbul edilən "İnvestisiya fondları haqqında" qanun bugünkü tələblərə cavab vermir. Ötən dövr ərzində Azərbaycanın fond bazarı kifayət qədər inkişaf edib, ona görə də qüvvədə olan qanun müasir bazarın hüquqi çərçivəsini tam əhatə edə bilməz. "Qanunda mövcud olan boşluqlar bu proseslərin daha dinamik inkişafına imkan vermir", - Səmədzadə deyib. - "Yeni qanun isə mövcud boşluqları kənarlaşdırmağa imkan yaradır".
Onun fikrincə, yeni qanun ölkədə qiymətli kağızlar bazarının inkişafına kömək edəcək ki, bu da ölkə iqtisadiyyatının şaxələnməsi proseslərinə xidmət göstərəcək və digər problemləri də həll etməyə imkan verəcək.
Qanun layihəsi hazırlanarkən dünyanın 30-dan çox ölkəsinin təcrübəsi öyrənilib, dünya maliyyə bazarları üzrə dərslər nəzərə alınmaqla işlənilib.
Qanun layihəsi 2008-ci ilin əvvəllərində, dünya maliyyə bazarlarında böhran vəziyyətinin gücləndiyi dövrdə hazırlanıb.
Ötən ilin noyabrında ABŞ-da "Böyük səkkizlik"in görüşündə dünya böhranının qarşısının alınması məqsədilə siyasətin istiqamətləri müəyyən edilib ki, onlardan ikisi maliyyə bazarlarının nizamlanmasına aiddir. İnvestisiya fondları maliyyə bazarlarında daha çox aktiv fəaliyyət göstərirlər. Ona görə də onların fəaliyyəti üçün nizamlayıcı çərçivələrdə də müəyyən formada dəyişikliklərin aparılması vacibdir.
"İnvestisiya fondları haqqında" qanun layihəsinin beynəlxalq ekspertizası üçün "First Initiative" texniki yardım proqramı çərçivəsində ekspertlər cəlb olunublar.
Ekspertlərin təkliflərindən biri investisiya fondu tərəfindən sərmayə paylarının alınmasının mümkünlüyünə aiddir. Halbuki qanun layihəsində payçının tələbi ilə qapalı payın sərbəst alınması nəzərdə tutulub. Onlar bunu yolverilməz hesab edirlər, çünki bu, kollapsa gətirib çıxara bilər.
Qanun layihəsində investisiya fondlarının fəaliyyəti sahəsində qüvvədə olan mexanizmin maksimum liberallaşdırılması nəzərdə tutulub. Dünyada investisiya, yardım, pay, vençur fondları kimi müxtəlif fondlar mövcuddur, Dövlət Komitəsi isə Azərbaycanda çoxfunksiyalı ümumi fondun yaradılmasını təklif edir.