Azərbaycan, Bakı, 18 avqust /Trend, müxbir A.Axundov/
Azərbaycanda nəqliyyat vasitələri sahiblərinin mülki məsuliyyətinin icbari sığortası üzrə ödənişlərə zəmanətin verilməsi üçün fondun yaradılmasına ehtiyac yoxdur. Bu barədə çərşənbə günü sığorta şirkəti "Paşa Sığorta" ASC idarə heyətinin sədri Nofəl Rzayev deyib.
"Ehtiyac yoxdur, belə ki, indiki qanunvericiliyə görə limitlər çox aşağıdır və sığorta şirkətləri tələblərlə sakitcə bacara bilərlər", - o qeyd edib.
Azərbaycan Maliyyə Nazirliyinin hazırladığı icbari sığorta növləri haqqında qanun layihəsi çərçivəsində nəqliyyat vasitələri sahiblərinin mülki məsuliyyətinin icbari sığortası üzrə tariflərin artırılması müzakirə edilir.
Rzayevin sözlərinə görə, sığorta ödənişləri şərtləri əvvəlki kimi qalacağı təqdirdə, aktuari və anderrayterlərin son hesablamalarına görə nəqliyyat vasitələri sahiblərinin mülki məsuliyyətinin icbari sığortası üzrə tarif, ən azı, ildə 40 manat məbləğində olmalıdır.
Hazırda sığortanın bu növü üzrə ödəniş ildə beş min manat (sağlamlığa vurulan zərərə görə) və mülkiyyətə vurulan ziyanın sığortalanmasına görə bir min manat təşkil edir. Nəqliyyat vasitələri sahiblərinin mülki məsuliyyətinin icbari sığortası üzrə sığorta haqqı 10 manatdır.
"Bu, sığorta şirkətlərini çox ciddi narahat edir, lakin bunun icbari sığorta növü olduğunu nəzərə alaraq, onlar müştəriyə bu xidmətin göstərilməsindən imtina edə bilməzlər. Onlar (sığortaçılar) buna (nəqliyyat vasitələri sahiblərinin mülki məsuliyyətinin icbari sığortasına) marağı tam itiriblər. Çünki bu, sığortaçı üçün maliyyə baxımından əsaslandırılmayıb", - Rzayev qeyd edib.
Onun sözlərinə görə, nəqliyyat vasitələri sahiblərinin mülki məsuliyyətinin icbari sığortası bazarının inkişafı könüllü avtomobil sığortası bazarına təsir etməyəcək.
"Bu onunla bağlıdır ki, nəqliyyat vasitələri sahiblərinin mülki məsuliyyətinin icbari sığortası məsuliyyət sığortasıdır, fərdi sığortalanmaya isə məsuliyyət həm daxil ola bilər, həm də daxil ola bilməz", - Rzayev vurğulayıb.
Hazırda Rusiyada avtomobil sahiblərinin məsuliyyətinin məcburi sığortası üzrə tariflər 90-200 dollar arasında dəyişir. Azərbaycanda sığortanın bu növü üzrə vahid tarif tətbiq edildiyi halda, Rusiyanın sığorta bazarında 80 dollar həddində baza tarifi tətbiq olunur və avtomobilin şərait və istismar yerindən, onun istehsal tarixindən, ondan istifadə edənin şəxsiyyətindən asılı olaraq müxtəlif göstəricilər müəyyən edilib.
Hazırda Maliyyə Nazirliyi sığorta şirkətləri ilə nəqliyyat vasitələri sahiblərinin mülki məsuliyyətinin icbari sığortası üzrə tariflərin 25 050 manatadək artırılmasını müzakirə edir.
Avqustun 18-nə rəsmi məzənnə 0,8038 AZN/USD təşkil edir.