Аzərbaycan, Bakı, 23 avqust /Trend, müxbir N.İsmayılova/
Xaricdə Azərbaycanın Əmanətlərin Sığortalanması Fondunun (ADIF) vəsaitlərinin idarə edilməsi üçün broker şirkəti Deutsche bank - Deutsche Invest-in törəmə şirkəti təyin olunub. Bu barədə bazar ertəsi Fondun icraçı direktoru Azad Cavadov bildirib.
"Hazırda Deutsche Invest-lə birgə hesab açılışı kimi fond aktivlərinin yerləşdirilməsi üzrə hazırlıq işləri aparılır və artıq sentyabrda Fondun öz aktivlərini xaricə yerləşdirəcəyini gözləyirik", - Cavadov bildirib.
Onun sözlərinə görə, bu gün Fondun cüzi vəsaiti (11 milyon manat) qısamüddətli dövlət istiqrazları (10 milyon manat) və ipoteka istiqrazlarında (1 milyon manat) yerləşdirilib.
Əmanətlərin Sığortalanması Fondunun kapitallaşdırılması üçün nəzərdə tutulmuş beş milyon avro dəyərində KfW kreditinin alınmasından sonra vəsaitlərin xarici banklarda qısamüddətli idarə edilməsi məqsədilə Fondun broker şirkəti cəlb etməsi ilə bağlı ADIF aktivləri 24 milyon manata yüksəlib.
Fondun investisiya siyasətinə əsasən, vəsaitlər xarici banklar və "AAA" reytinqli maliyyə institutlarının yüksək reytinqli qiymətli kağızlarında yerləşdirilib.
Bu gün ölkədə fəaliyyət göstərən 47 bankın 43-ü Fondun üzvüdür. ADIF fəaliyyətə 2007-ci il avqustun 13-də başlayıb. İkinci rübün yekunlarına əsasən, ADIF-ə üzv olan banklarda fiziki şəxslərin ümumi depozitləri 2,483 milyard manat təşkil edib ki, bunun da 818 milyon manatı sığortalanmayan, 1,665 milyard manatı isə sığortalanan əmanətlərin payına düşür.
Avqustun 23-nə olan rəsmi məzənnə 0,8038 AZN/USD təşkil edir.