Azərbaycan, Bakı, 1 sentyabr /Trend, müxbir N.İsmayılova/
Ümumdünya Ticarət Təşkilatına (ÜTT) üzv ölkələrlə çoxtərəfli danışıqların VIII raundunun 2010-cu ilin noyabrında keçiriləcəyi gözlənilir. Bu barədə çərşənbə axşamı Azərbaycan İqtisadi İnkişaf Nazirliyinin xarici ticarət siyasəti və ÜTT-yə daxilolma üzrə şöbəsinin rəhbəri Bəxtiyar Alışov deyib.
"Biz ümid edirik ki, növbəti görüş noyabrda keçiriləcək, bu ay biz ÜTT katibliyinə tarif siyasəti üzrə yeni təkilflər təqdim etmişik. Həmin təkliflərdə Azərbaycanda istehsal olunan bəzi məhsullar, əsasən, kənd təsərrüfatı məhsulları üzrə tərəfimizdən tarif dərəcələrinin balları dəyişdirilib", - o qeyd edib.
İkitərəfli danışıqlar iyulda yalnız xidmət sahələri üzrə baş tutub. Danışıqlar Avropa İttifaqı, Çinin Tayvan əyaləti, Hindistan və digər ölkələrlə aparılıb.
ÜTT işçi qrupu ilə iyul [2009-cu il] görüşündən sonra [çoxtərəfli danışıqların VII mərhələsi], ABŞ və Aİ ilə yanaşı, Avstraliyadan Azərbaycanın tətbiq etməyə hazırlaşdığı daxili dəstək və ixrac subsidiyalarının qrafiki, Braziliyadan tariflərlə bağlı, Cənubi Koreyadan həm tariflər, həm də xidmətlər sahəsi ilə bağlı suallar və şərhlər alınıb. Aİ və ABŞ-la ikitərəfli danışıqlar prosesində tarif öhdəlikləri də əsasdır. Tarif siyasəti ilə yanaşı, onların tələbləri əqli mülkiyyət məsələləri üzrə xidmətlər sahəsinin liberallaşdırılmasına da aiddir. Onlar maliyyə, kommunikasiya sektorlarında, distribüter servisi, paylayıcı sahələrdə bazarların açılmasını təklif edirlər.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir. 2009-cu ildə bu siyahıya İsveçrə də qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə, hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalanmaya razılıq verib.
Bu yaxınlarda ÜTT Katibliyi Azərbaycan üzrə işçi qrupunun tərkibini genişləndirib və ora daha 4 ölkə - Ukrayna, Braziliya, Ekvador və İsveçrəni əlavə edib. Nəticədə, işçi qrupun üzvlərinin sayı, Aİ-nin 27 ölkəsi də daxil olmaqla, 32-yə çatıb.
ÜTT Katibliyi yanında Azərbaycan üzrə işçi qrup 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
