Azərbaycan, Bakı, 9 dekabr /Trend, müxbir Ü.İsmayılova/
Azərbaycanın sığorta şirkəti "AtaSığorta" 2010-cu ilin yekunları üzrə sığorta haqlarının həcmini 4 milyon manata çatdırmağı planlaşdırır. Bu barədə cümə axşamı şirkətin idarə heyətinin sədr müavini İsrail Qarayev deyib.
"Şirkətin strategiyasına əsasən, sığorta haqlarının illik artımı 25 faiz səviyyəsində proqnozlaşdırılır və cari il üçün bu məqsədə şirkət artıq 11 ayın yekununa görə nail olub", - Qarayev qeyd edib.
Onun sözlərinə görə, 11 ay ərzində şirkətin sığorta haqları ilin sonunadək yığımların həcmini 3,12 milyon manatadək çatdırmaq proqnozu ilə 3,477 milyon manat təşkil edib. Yanvar-noyabr aylarında şirkətin ödənişləri 554 min manat təşkil edib.
Qarayevin sözlərinə görə, şirkətin portfeli əsasən kasko sığortası (1,597 milyon manat), tibbi sığorta - 896 min manat, əmlak sığortası - 344 min manat və yanğından icbari sığorta - 162 min manat sayəsində formalaşıb.
Ödənişlərin çoxu şirkət tərəfindən kasko sığortası - 308 min manat, tibbi sığorta - 224 min manat üzrə həyata keçirilib.
"Fəaliyyətin yekunlarına görə şirkət 2011-ci ildə də yığımların həcmini 25 faiz artırmağı planlaşdırır", - Qarayev qeyd edib.
"AtaSığorta" ASC 21 iyul 2004-cü il tarixində rəsmi dövlət qeydiyyatından keçib və 3 sentyabr 2004-cü il tarixdən etibarən tam lisenziyalı sığorta şirkəti kimi fəaliyyətə başlayıb. Təsisçisi "AtaHoldinq" ASC olan şirkətin nizamnamə kapitalı 4,8 milyon manatdır. "AtaSığorta" ASC həm həyat, həm də qeyri-həyat sığorta siniflərinə aid olan 21 könüllü və 5 icbari olmaqla, ümumilikdə 26 növ üzrə sığorta xidmətləri göstərir.
