Azərbaycan, Bakı, 21 yanvar /Trend, müxbir N.İsmayılova/
2010-cu ildə Azərbaycanda orta aylıq əməkhaqqının məbləği 325 manat təşkil edib. Bu, onun 2009-cu ildəki məbləğindən 9,1 faiz çoxdur. Bu barədə Dövlət Statistika Komitəsindən bildiriblər.
Ən yüksək əməkhaqqı mədən sənayesində, maliyyə və sığorta fəaliyyəti, informasiya və rabitə, elmi və texniki fəaliyyət sahələrində, eləcə də tikinti sektorunda işləyənlərdə qeydə alınıb.
Müəssisə və təşkilatların işçiləri yanvar-oktyabrda 15,8 milyon manat məbləğində sosial təyinatlı təzminatlar alıblar. Onların əsas alıcısı mədən sənayesı, enerji, qaz və suyun istehsalı və bölüşdürülməsi üzrə müəssisələr, maliyyə, sığorta, nəqliyyat, rabitə fəaliyyətinin işçiləri olublar.
2010-cu ildə adambaşına düşən nominal gəlir 2866 manat təşkil edib ki, bu da ötən ilin müvafiq göstəricisini 11,9 faiz ötür. Adambaşına düşən real pul gəliri 12,9 faiz artımla 2619,6 manat təşkil edib.
Hesabat dövrü ərzində orta aylıq əməkhaqqı əhalinin aylıq adambaşına düşən pul gəlirlərini 36,1 faiz ötüb.
2010-cu ildə Azərbaycan əhalisinin nominal pul gəliri 25605,6 milyon manat olub ki, bu da ötən ilin göstəricisindən 13,3 faiz çoxdur. Bu dövrdə əhalinin real pul gəliri 14,2 faiz artımla 23404,5 milyon manata çatıb.
Hesabat dövründə əhali mal alınması və xidmətlərə şəxsi gəlirlərinin 70 faizini, vergilər, digər məcburi ödənişlər və könüllü üzvlük haqları ödənilməsinə 8,6 faiz və kapitalın artırılmasına 20 faizini sərf edib.
