Azərbaycan, Bakı, 28 yanvar /Trend, müxbir N.İsmayılova/
Azərbaycanın 2011-ci il dövlət büdcəsi proqnozlarında düzəlişlərin edilməsi məsələsinə birinci və ya ikinci rübün iqtisadi inkişafının nəticələri üzrə baxıla bilər. Bu barədə cümə günü jurnalistlərə Parlamentin İqtisadi siyasət komissiyasının sədri Ziyad Səmədzadə bildirib.
"Bu il üçün büdcə proqnozlarında neftin qiyməti 60 dollar həcmində müəyyən edilib. Halbuki bu gün neftin orta qiyməti bir barel üçün 100 dollar civarındadır", - Səmədzadə bildirib.
Onun sözlərinə görə, Azərbaycan üçün strateji hədəf Dövlət Neft Fondundan transferlərin həcminin azaldılmasıdır.
"Neft Fondundan əhəmiyyətli həcmdə vəsaitin ayrılmasına dair qərar Azərbaycanın öz iqtisadi inkişafının sürətləndirilməsi zərurətini dərk etməsi ilə bağlı idi və bu inkişafın maliyyələşdirilməsi üçün fondun vəsaitlərindən istifadə olundu", - Səmədzadə bildirib.
2011-ci ildə dövlət büdcəsinin gəlirləri 12 061, xərcləri 12 748 milyon manat həcmində nəzərdə tutulub. Dövlət Neft Fondundan transfertlər 6 480 milyon manat səviyyəsində təsdiqlənib.
Yanvarın 28-nə rəsmi məzənnə 0,7969 AZN/USD təşkil edir.
