Аzərbaycan, Bakı, 17 mart /Trend, müxbir Ü.İsmayılova/
Martın 1-nə olan vəziyyətə görə, Azərbaycanda 37 min hektar ərazidə dənli bitkilərin yazlıq səpini həyata keçirilib ki, bu da ötən ilin analoji dövründəkindən 12,5 faiz çoxdur. Bu barədə cümə axşamı Dövlət Statistika Komitəsindən Trend-ə verilən məlumatda deyilir
Eləcə də 1,8 min hektar ərazidə dənli-paxlalı bitkilərin səpini, 11,4 min hektar - kartof, 5,6 min hektar - tərəvəz və 11 hektarda bostan bitkiləri əkilib.
Bu dövrdə ölkədə ötən ilin analoji dövrünə nisbətən mal əti istehsalı 5,5 faiz və ya 3,5 min tondan 66,2 min tonadək, süd - 24 min ton və ya 11,3 faiz 237,4 min tonadək artıb, toyuq yumurtası 29,5 milyon ədəd və ya 14,8 faiz azalaraq 169,8 milyon ədəd olub.
Bu il 2677 ton bitkiçilik məhsulları istehsal edilib ki, bu da 2010-cu ilin analoji dövründəkindən 15,6 faiz çoxdur.
Dövlət Statistika Komitəsinin məlumatına görə, yanvar-fevralda kənd təsərrüfatı məhsulları istehsalının ümumi həcmi ötən ilin analoji dövrü ilə müqayisədə 5,8 faiz artıb.
Yanvarda Azərbaycana 356,8 ton (609,2 min dollar məbləğində) mal əti, 584,4 ton (446,7 min dollar) quş əti, 528,3 ton (334,8 min dollar) süd və qaymaq, 606,4 ton (1 654,5 min dollar) kərə yağı, 3 274,4 ton (274,4 min dollar) kartof, 6 458,4 ton (1 410 min dollar) təzə tərəvəz, 4 686,2 ton (2 407,9 min dollar) təzə meyvə və s. idxal olunub.
