Azərbaycan, Bakı, 4 aprel /Trend, müxbir İ.Xəlilova/
İslam İnkişaf Bankının (İİB) Mil-Qarabağ su kollektorunun yenidən qurulması layihəsinin texniki-iqtisadi əsaslandırmasının (TİƏ) hazırlanması üzrə məsləhətçisi banka ilk hesabatını təqdim edib. İşlərin beş ay ərzində tam başa çatacağı gözlənilir. Bu barədə bazar ertəsi İİB-in Bakı ofisindən məlumat verilib.
2008-ci ilin payızında İİB Direktorlar Şurası Mil-Qarabağ su kollektorunun yenidənqurulma layihəsinin TİƏ-nin hazırlanmasına 347 min dollar məbləğində qrant ayrılmasını təsdiqləyib. Kollektorun yenidən qurulmasının vacibliyini burada müvafiq araşdırma aparan Azərbaycan Fövqəladə Hallar Nazirliyi də təsdiqləyib. Kollektor hazırkı vəziyyətində nəinki öz təyinatına cavab vermir, yaxınlıqdakı ərazilər üçün də təhlükə törədir.
"TİƏ-nin hazırlanmasına artıq başlanılıb, bundan sonra layihənin maliyyələşdirilməsi üçün zəruri vəsaitin həcmi müəyyən ediləcək. İİB-in praktikasına görə, əgər bank TİƏ-nin hazırlanması üçün qrant verirsə, onda gələcəkdə maliyyələşdirməni də o öz üzərinə götürür", - hökumətdən deyilib.
İlkin qiymətləndirmələrə görə, layihənin həyata keçirilməsi üçün 70 milyon dollardan artıq vəsait tələb olunur. Su kollektorunun yenidən qurulması daha bir neçə yüz min hektar torpağın becərilməsinə imkan verəcək.
Bu fəaliyyət bir neçə il əvvəl Kənd Təsərrüfatı Nazirliyi tərəfindən işlənib hazırlanan "Səhralaşmanın qarşısının alınması və onun kənd təsərrüfatına təsirinin azaldılması üzrə Milli Proqram" çərçivəsində əlaqələndirilir. Kollektorların, su kanallarının və su anbarının tikintisi ilə yanaşı, milli proqramın ən mühüm istiqamətləri aqrometeostansiyaların işinin yaxşılaşdırılması, quraqlığa və torpağın şoranlığına davamlı yeni bitki sortlarının becərilməsi, qənaətli suvarma texnologiyalarının tətbiqidir.
Bu gün Azərbaycanda suvarılan torpaqların ümumi sahəsi 1426 min hektar təşkil edir ki, onun 130 min hektarı işğal altındadır, 30-40 min hektar isə sərhəd zonasına aiddir. Bununla yanaşı, respublikada ümumi tutumu 21 milyard kubmetr olan 189 su anbarı, 812 nasos stansiyası, ümumi uzunluğu 50 min kilometr olan su kanalları, 6500 artezian quyu var.
İİB-in vəsaitləri 67 kilometrlik Xanarx kanalının tikintisi üçün cəlb edilib ki, bunun üçün bank tərəfindən 9,4 milyon dollar ayrılıb.
Ölkənin dörd şimal rayonunda (Xaçmaz, Quba, Qusar və Şabran) 62 min hektar ərazinin suvarma sistemini yaxşılaşdırılmasını nəzərdə tutan kanalın tikintisinə 2002-ci ildə başlanıb və 2007-ci ildə başa çatıb.
