Azərbaycan, Bakı, 12 may /Trend, müxbir A.Axundov/
Azərbaycanın sığorta bazarı kifayət qədər həcmlidir, lakin sığorta şirkətləri tərəfindən mənimsənilməyib. Bu barədə "Qarant Sığorta" şirkətinin idarə heyətinin sədri Vaqif Həsənov bildirib.
"Hazırda bazar 70-80 faizədək tamamilə sərbəstdir. Bu o deməkdir ki, fəaliyyət üçün sahə var, bu isə, təbii ki, bizim böyük üstünlüyümüzdür", - Həsənov deyib.
Onun sözlərinə görə, Avropa ölkələrinin sığorta bazarlarında vəziyyət elədir ki, sığorta şirkəti harasa müraciət etdikdə, orda artıq başqa sığortaçı olur. Azərbaycanda isə belə problem yoxdur.
Sığortaçıların fikrincə, ölkədə sığorta bazarının potensialı bir milyard manat həcmində qiymətləndirilir. Halbuki ötən ilin yekunları üzrə o, 155,59 milyon manat təşkil edib.
Hökumətin proqnozalrına görə, 2025-ci ilədək ölkədə sığorta bazarının həcmi ÜDM-in 3 faizini təşkil edəcək və üç milyard dollar səviyyəsində olacaq.
Azərbaycanda 28 sığorta və bir təkrarsığorta şirkəti fəaliyyət göstərir.
Mayın 12-nə rəsmi məzənnə 0,7908 AZN/USD təşkil edir.
