Azərbaycan, Bakı, 26 may /Trend, müxbir A.Axundov/
Azərbaycanın Hesablama Palatası 2011-ci il üzrə sosial müdafiə və sosial təminat xərclərinin "Azərbaycan Respublikasının 2011-ci il dövlət büdcəsi haqqında" qanunda müəyyən olunan 1,324 milyard manatdan 1,612 milyard manatadək (287,75 milyard manat yaxud 21,7 faiz artım) artırılmasını əsaslandırılmış hesab edir. Bu barədə "Azərbaycan Respublikasının 2011-ci il dövlət büdcəsi haqqında" qanuna düzəlişlərlə bağlı qanun layihəsinə dair Hesablama Palatasının rəyində bildirilib.
Bazar ertəsi Milli Məclisin İqtisadi siyasət və sosial siyasət komitələri "Azərbaycan Respublikasının 2011-ci il dövlət büdcəsi haqqında qanuna dəyişikliklər edilməsi haqqında" qanun layihəsini ölkə parlamentində müzakirələrə təqdim edib.
"Xərclərin bu növü üzrə artım ölkə ÜDM-də proqnozlaşdırılan artımı nəzərəçarpacaq dərəcədə üstələyir. Çünki ÜDM-in nominal həcminin proqnozu 40197,3 milyon manatdan 44788,8 milyon manatadək (artım 4591,5 milyon manat yaxud 11,4 faiz) artırılması proqnozlaşdırılır", - rəydə bildirilir.
Sosial müdafiə və sosial təminat xərclərinin 287,75 milyon manat artım həcmi sosial müdafiənin payına düşür. Bu yardımçı bölmə üzrə proqnozun 1,306 milyard manatdan 1,594 milyard manatadək artırılacağı ehtimal olunur.
Bu bölmədə, başlıca olaraq ailə və uşaqların sosial müfadiəsi xərclərinin (artım 18,1 min manatdan 207,5 milyon manatadək) və başqa sosial müdafiə xərclərinin (artım 287,7 milyon manatdan 1,383 milyard manatadək) artırılacağı güman edilir.
Müdafiə, kommunal, kommunikasiya xərcləri və bu xidmətlər üzrə yeni tariflərin tətbiqi 5,247 milyon manat səviyyəsində planlaşdırılır ki, bunlar əsasən malların alınmasına yönəldiləcək.
Eləcə də əməkhaqqı sisteminin təkmilləşdirilməsi, pensiya təminatı və digər tədbirlər üzrə planlaşdırılan xərclərin 20,172 milyon manatdan 302,68 milyon manatadək artırılacağı ehtimal olunur.
Dövlət Sosial Müdafiə Fonduna transfertlərin məbləği üzrə proqnoz dəyişməyərək 691 milyon manat səviyyəsində qalır.