Azərbaycan, Bakı, 31 may /Trend, müxbir N.İsmayılova/
2011-ci ilin birinci rübündə Azərbaycan Mərkəzi Bankı yanında Mərkəzləşdirilmiş Kredit Reyestri Xidmətinə ölkədəki 41 bankdan 95 418 müraciət daxil olub. Bu barədə çərşənbə axşamı xidmətdən məlumat verilib. Müraciətlərin ümumi sayından 81 379 müraciət yeni borcgötürənlərdən daxil olub.
2010-cu ilin analoji dövrü ilə müqayisədə xidmətə edilən müraciətlərin sayı 2,49 dəfə artıb. 2010-cu ilin birinci rübündə sorğuların ümumi sayı 7 432 652 təşkil edib. Cari ilin birinci rübündə 165 şəxs təşkilata öz kredit hesabatını almaq məqsədilə müraciət edib.
Cari ilin birinci rübünün sonuna olan məlumata görə, kredit reyestrində haqqında məlumat olan borcgötürənlərin sayı 1 023 215, kredit məlumatlarının ümumi sayı isə 2 024 935 təşkil edir. Reyestrdə olan borcgötürənlər üzrə məlumatların sayı 471 197 təşkil edir.
Mərkəzləşdirilmiş Kredit Reyestri Xidməti 2005-ci ilin martından fəaliyyət göstərməyə başlayıb. Fiziki şəxslər üzrə bir sorğunun tarifi 1,1 manat, hüquqi şəxslər üçün iki manat təşkil edir. Kredit reyestri kommersiya məqsədləri daşımır, tariflər inzibati xərclərin ödənilməsi üçün tətbiq edilir.
Mayın 31-nə rəsmi məzənnə 0,7 894 AZN/USD təşkil edir.
