Azərbaycan, Bakı, 21 iyun /Trend, müxbir A.Axundov/
2011-ci ilin yanvar-mayında Azərbaycan 130,064 milyon dollar məbləğində taxıl idxal edib ki, bu da ümumi idxalın 3,73 faizini təşkil edir və ötən ilin müvafiq dövründəki göstəricidən 49,78 dəfə çoxdur. Bu barədə Dövlət Gömrük Komitəsindən məlumat verilib.
Yanvar-mayda un idxalı 73,42 dəfə - 31,46 milyon dollaradək artıb ki, bu da həmin dövr ərzində idxalın ümumi həcminin 0,9 faizini təşkil edib.
Hesabat dövründə 465,552 milyon dollar məbləğində (il ərzində artım 29,23 faiz) qida məhsulları idxal olunub ki, bu da ölkənin ümumi idxalının 13,34 faizini təşkil edib.
İlk beş ay ərzində qida məhsullarından 61,386 milyon dollar məbləğində şəkər (il ərzində artım 1,32 faiz, idxalda ümumi pay - 1,76 faiz), 57,121 milyon dollarlıq yağ (il ərzində azalma 4,41 faiz, idxalda ümumi pay - 1,64 faiz), 6,906 milyon dollarlıq ət (artım 28,63 faiz, idxalda ümumi pay - 0,25 faiz), 4,098 milyon dollarlıq süd (artım 36,98 faiz, idxalda ümumi pay - 0,12 faiz) təşkil edib.
İlin ilk beş ayı ərzində Azərbaycan idxalının böyük hissəsi - 31,38 faizi maşınların, mexanizmlərin, avadanlıqların, elektrik cihazlarının və onların ehtiyat hissələrinin payına düşüb. Yanvar-mayda 1,095 milyon dollar məbləğində maşın və avadanlıqlar idxal olunub ki, bu da ötən ilin müvafiq dövr göstəricisini 79,41 faiz ötür.
Həmçinin, ölkəyə 553,495 milyon dollar məbləğində (artım 59,87 faiz, idxalda ümumi payı - 15,86 faiz) nəqliyyat vasitələri və onların hissələri, 439,4 milyon dollar məbləğində qara metallar və ondan hazırlanan məmulatlar (artım 39,96 dəfə, idxalda ümumi payı - 15,59 faiz) və 93,784 milyon dollar məbləğində oduncaq və ondan hazırlanan məmulatlar (artım 52,21 faiz, idxalda ümumi payı - 2,69 faiz), 20,637 milyon dollarlıq xalq istehlakı malları (artım 12,27 faiz, idxalda ümumi payı - 0,59 faiz), 20,815 milyon dollarlıq mebel və onun hissələri (artım 14,27 faiz və ümumi idxalda payı - 0,6 faiz), 65,742 milyon dollarlıq əczaçılıq məhsulları (artım 26,22 faiz və ümumi idxalda payı - 1,88 faiz) gətirilib.
Yanvar-mayda Azərbaycanın idxalı 3,49 milyard dollar təşkil edib ki, bu da 2010-cu ilin analoji dövrü ilə müqayisədə 45,06 faiz çoxdur.
İlin ilk beş ayı ərzində ixrac əməliyyatları 10,583 milyard dollar təşkil edib ki, bu da 2010-cu ilin analoji dövrü ilə müqayisədə 29,43 faiz çoxdur.
Ölkədə mal dövriyyəsinin ümumi həcmi 14,073 milyard dollar təşkil edib. Bu, 2010-cu ilin analoji dövrü ilə müqayisədə 32,98 faiz çoxdur.
Xarici ticarət əməliyyatlarında 7,093 milyard dollar həcmində müsbət saldo yaranıb.
