Gürcüstan, Tbilisi, 23 sentyabr /Trend, müxbir N.Kirsxaliya/
Azərbaycan Gürcüstanın iri xarici ticarət tərəfdaşları arasında ikinci yeri tutur. Bu barədə cümə günü Trend-ə Gürcüstanın Statistika Komitəsindən bildirilib.
Məlumata əsasən, iki ölkə arasındakı əmtəə dövriyyəsi bu ilin yanvar-iyul ayları ərzində 621,7 milyon dollar təşkil edib ki, bu, keçən ilin müvafiq dövründəkindən 10,9 faiz artıqdır.
Gürcüstan Azərbaycana 234,3 milyon dollarlıq (keçən ilin müvafiq dövrü ilə müqayisədə artım 17,1 faizdir) məhsul ixrac edib və 386,6 milyon dollarlıq (artım 9 faiz) mal idxal edib.
Siyahıda birinci yeri Türkiyə (945,8 milyon dollarlıq əmtəə dövriyyəsi ilə), üçüncü yeri isə Ukrayna (545,9 milyon dollar) tutub.
Ümumilikdə isə, Gürcüstanın həmin dövr ərzində xarici ticarət dövriyyəsi 5,7 milyard dollar olub ki, bu, ötən ilin müvafiq dövründəkindən 39 faiz çoxdur. Bunun 1,4 milyard dolları (artım 41 faiz) ixrac, 4,3 milyard dollarını isə (artım 38 faiz) idxaldır.