Azərbaycan, Bakı, 27 sentyabr /Trend, müxbir İ.Xəlilova/
Dünya Bankı (DB) oktyabrın əvvəlində kənd təsərrüfatının inkişafı və kreditləşdirilməsi uyğunlaşdırılmış proqramının III mərhələsinə hazırlıq üzrə Azərbaycan hökuməti ilə danışıqlara başlamağa planlaşdırır. Bu barədə Trend-ə çərşənbə axşamı bankın Bakı nümayəndəliyindən bildirilib.
Bunun həyata keçirilməsi üçün bank 30-50 milyon dollar arası vəsait ayırmağı nəzərdə tutur.
"Bu layihənin təsdiq olunması 2012-ci ildə gözlənilir və danışıqlar prosesində DB kreditinin məbləği hələ dəqiqləşdiriləcək", - nümayəndəlikdən deyiblər.
Məlumata görə, hazırda proqramın II mərhələsinin həyata keçirilməsi davam edir. kredit sazişi 2006-cı ilin payızında imzalanıb. "Bank layihənin qüvvədə olma müddətini 2012-ci il fevral ayına qədər artırıb, çünki vaxt bu ilin mayında tamamlanıb", - nümayəndəlikdən bildirilib.
Bu layihənin həyata keçirilməsi fermerlərin gəlirlərini və kənd təsərrüfatı müəssisələrinin məhsuldarlığını artırmağa xidmət edir. Layihənin həyata keçirilməsi 2007-ci ildən başlayıb və 4 il müddətinə nəzərdə tutulub.
Layihənin ümumi qiyməti 58 milyon dollardır, bunun təxminən 30 milyon dolları bankın kreditinin payına düşür. Eyni zamanda, Beynəlxalq İnkişaf Assosiasiyasının (BİA) vəsaitindən 20,5 milyon dollar və assosiasiyanın ağır şərtləri hesabına daha 8 milyon dollar ayrılıb ki, bunlar 2 faiz liborla 10 il müddətində ödənişi təxirə salma şərti ilə 35 ilə nəzərdə tutulub.
Layihə iki hissədən ibarətdir. Birinci komponentin qiyməti 42 milyon dollar təşkil edir və kənd təsərrüfatı biznes-xidmətlərinə dəstəyə hesablanıb. Bu mərhələdə ölkə regionlarında maliyyə xidmətlərinin gücləndirilməsi, xüsusilə, proqramın birinci mərhələsi çərçivəsində təşkil olunmuş kredit ittifaqlarının fəaliyyətinin möhkəmləndirilməsini nəzərdə tutur. Eyni zamanda, yerli bankların potensialının gücləndirilməsi, icarə şirkətlərinə, informasiya və satış xidmətlərinə dəstək də nəzərdə tutulur.
14 milyon dollarlıq ikinci hissə isə kənd təsərrüfatı istehsalının və məhsuldarlığının artırılması, məsləhət xidmətlərinin genişləndirilməsi, baytarlıq xidmətlərindən istifadə imkanlarının gücləndirilməsi, yeni kənd təsərrüfatı texnologiyalarının tətbiqini nəzərdə tutur.
