Azərbaycan, Bakı, 27 sentyabr /Trend, müxbir A.Axundov/
Sumqayıt Texnologiyalar Parkı (STP) bu il öz məhsulunu ixrac etməyə başlaya bilər. Trend-in məlumatına görə, bunu çərşənbə axşamı jurnalistlərə Parkın tikintisini həyata keçirən AZENCO tikinti-montaj şirkətinin idarə heyəti sədrinin müavini Zaur Məmmədov deyib.
"Bizim öz məhsulumuzu xarici bazarlara ixrac etmək üçün bir neçə layihəmiz var. Hazırda hazırlıq işləri gedir, o cümlədən məhsulumuza beynəlxalq sertifikatların alınması üzrə işlər aparılır", - Məmmədov bildirib.
Onun sözlərinə görə, birinci növbədə texnoparkda işləyən kabel zavodu və plastik boru istehsal edən zavodun məhsulları ixrac olunacaq.
"Böyük ehtimalla, sendviç-panellər də ixrac olunacaq. Fikrimcə, Günəş kollektorları da məşhur olacaq. Həmçinin, maşınqayırma zavodunun məhsulları da maraqlıdır", - o deyib.
Məmmdəovun sözlərinə görə, ilkin mərhələdə STP-nin məhsulları Qazaxıstan, Gürcüstan, Türkiyə və Rusiya kimi yaxın ölkələrə ixrac olunacaq. "Gələcəkdə biz daha geniş bazarlara çıxmağı planlaşdırırıq", - o deyib.
Onun sözlərinə görə, ölkədə STP-nin iri müştəriləri arasında Azərbaycan Respublikası Dövlət Neft Şirkəti, "Azərenerji" ASC, "Azərsu" Dövlət Şirkəti də var.
"Abşeron yarımadasında və ölkənin digər rayonlarında qazlaşdırma işləri STP-də istehsal olunan borularla həyata keçirilir, həmçinin, demək olar ki, bütün yüksəkgərginlikli və digər elektrik xətlərinin çəkilmə layihələrində Azərbaycanda STP-də istehsal edilmiş kabellərdən istifadə olunur", - Məmmədov deyib.
Müəssisədə müasir texnologiyalar əsasında respublika üçün mühüm əhəmiyyət kəsb edən və ixrac potensialına malik elektroenergetika və maşınqayırma sənayesi məhsullarının istehsalı nəzərdə tutulub. 18 zavoddan ibarət olan bu Texnologiyalar Parkında respublika əhəmiyyətli müxtəlif çeşidli məhsullar, o cümlədən müxtəlif tip kabellər, transformatorlar, yüksəkgərginlikli avadanlıqlar, hidroturbinlər, su nasosları, elektrik mühərrikləri, borular, texniki qazlar istehsal edilir.