Azərbaycan, Bakı, 30 sentyabr /Trend, müxbir A.Axundov/
Azərbaycan Sığortaçılar Assosiasiyası (ASA) ölkənin sığorta bazarını araşdırmağa davam edəcək. Trend-in məlumatına görə, bunu jurnalistlərə cümə günü ASA-nın icraçı direktoru Azər Əliyev deyib.
Bundan əvvəl ASA tibbi sığorta sahəsində yerli bazarda tədqiqat aparıb və bu araşdırma əsasında könüllü tibbi sığorta (KTS) sahəsində tövsiyələr hazırlayıb.
"Aparılan tədqiqatların məğzi vəziyyəti başa düşmək üçün bazarın ən problemli sahələrinin öyrənilməsindədir. Tibbi sığorta bazarının tədqiq olunması bizim gələcəkdə edəcəklərimizin başlanğıcları, rüşeymləridir", - Əliyev deyib.
Onun sözlərinə görə, assosiasiya hələ avtomobil sığortası kimi bazarın əsas sahələrini tədqiq etmir, çünki bu sahədəki vəziyyət az-çox idarə olunandır.
"Ancaq tibbi sığortada vəziyyət çox da yaxşı deyil. Bu növ üzrə sığortaçıların satdığı məhsullar bu gün zərər gətirir; bu xidmətlərdən istifadə edən əhali tibbi sığortanın mahiyyətini düzgün başa düşmür. Ona görə də biz işə tibbi sığortadan başladıq ki, bu da çox vacib və lazımlı növdür", - Əliyev bildirib.
İcraçı direktorun sözlərinə görə, 2012-ci ildə ASA sığorta sahəsindəki işçilərin ixtisaslarının artırılmasına daha çox diqqət yetirəcək.
"Bizim ötən il qəbul olunmuş ikiillik strategiyamızda assosiasiyanın iki əsas fəaliyyət istiqaməti müəyyən olunub - əhali arasında sığortanın təbliğ olunması və sığortaçıların akademik biliklərinin və peşəkarlıqlarının səviyyəsinin artırılması. Hesab edirəm ki, təbliğat məsələlərində biz yaxşı nəticələr əldə etmişik. Amma təhsil məsələlərinə gəlincə, burada üzərində işlənəsi mövzular var. Gələn il biz yəqin ki, buna diqqət yetirəcəyik, lakin 2012-ci ilin əməliyyat planı hələ qəbul olunmayıb", - o deyib.
Azərbaycanda 28 sığorta və bir təkrar sığorta şirkəti var. Onların hamısı ASA-nın üzvüdür. "Fidan Sığorta" şirkətinin lisenziyası müvəqqəti olaraq dayandırılıb.
Sentyabrın 30-na olan rəsmi məzənnə 0,7869 AZN/USD təşkil edir.
