Azərbaycan, Bakı, 2 noyabr /Trend, müxbir E.İsmayılov/
Azərbaycan Respublikası Dövlət Neft Fondunun (ARDNF) valyuta vəsaitlərinin saxlanması, yerləşdirilməsi və idarə olunması qaydalarına dəyişikliklər edilməsi çərçivəsində Fondun yeni aktivlərinin idarə edilməsi üçün yeni xarici menecerlərin cəlb edilməsi planlaşdırılır. Trend-in məlumatına görə, bu barədə çərşənbə günü jurnalistlərə ARDNF rəhbəri Şahmar Mövsümov deyib.
"Yeni menecerlərin cəlb edilməsi ona görə vacibdir ki, Dövlət Neft Fondu yeni aktivlərin istifadəsinə başlayır. Dövlət Neft Fondunun menecerləri gəlirlərin təsbit edilməsi üzrə Fondun portfelinin idarə edilməsi ilə məşğul olurlar", - Mövsümov bildirib.
Hazırda ARDNF-in menecerləri Dünya Bankının Xəzinədarlıq İdarəsi, "Clarident" (Credit Suisse-in bölməsi) və "Deutschebank Asset Management" banklarıdır.
Qaydada edilən dəyişikliklərdə Fondun investisiya portfelinin idarə edilməsi üçün cəlb edilən xarici menecerlərə qarşı tələblər dəqiqləşdirilib. Belə ki, Fondun vəsaitlərinin idarə edilməsi üçün cəlb edilən xarici menecerin özünün və ya onun əsas təsisçisinin kredit reytinqi investisiya dərəcəli kredit reytinqindən ("Standard & Poor's" və ya "Fitch" və ya "Moody's") aşağı olmamalı və ya onun aktivlərin idarə edilməsində 5 ildən az olmayan müsbət təcrübəsi və yaxud dəyəri 1 mlrd. ABŞ dolları məbləğindən az olmayan aktivlərin idarə edilməsində səriştəsi olmalıdır.
Neft Fondu idarəetmədə xarici menecerlərə öz investisiya portfelinin 60 faizə qədərini göndərə bilər, lakin bir menecer portfelin ümumi qiymətinin 15 faizindən çoxunu ala bilməz. İnvestisiya fondunda Fondun aktivləri üzrə gəlirlərin müəyyənləşdirilməsi üçün baza indikatoru (benchmark) Böyük Britaniya Banklar Assosiasiyasının dərc etdiyi üçaylıq LIBOR tarifidir.
Mövsümovun sözlərinə görə, Fondun vəsaitlərinin kapital qoyuluşunun yeni istiqamətlərindən biri qızıl ehtiyatlarına - sikkə qızıllara və qızıl külçələrə yerləşdirmədir. "Burada ən əsas qızılın ümumi qəbul edilmiş standartlara uyğun olmasıdır və təbii ki, Azərbaycan qızılı da öyrəniləcək", - Mövsümov deyib.
Dövlət Neft Fondu 1999-cu ildə yaradılıb və həmin vaxt onun aktivləri 271 milyon dollar təşkil edib.
Oktyabrın 1-nə olan vəziyyətə görə, ARDNF-in aktivləri bu ilin əvvəli ilə müqayisədə 41,6 faiz (22 milyard 766,8 milyon dollar) artaraq 32 milyard 242,5 milyon dollar təşkil edib.