Gürcüstan, Tbilisi, 11 noyabr /Trend, müxbir N.Kirsxaliya/
Hava şəraitinin əlverişsiz olmasına baxmayaraq, Bakı-Tbilisi-Qars (BTQ) dəmir yolunun Gürcüstan hissəsində işlər gecə-gündüz aparılır. Bu barədə Trend-ə cümə günü Gürcüstanın regional inkişaf və infrastruktur naziri Ramaz Nikolaşvili məlumat verib.
Onun sözlərinə görə, tikinti işləri yolun Marabda-Karsaxi hissəsində, Gürcüstan-Türkiyə sərhədi yaxınlığında aparılır.
Nikolaşvili Azərbaycan şirkəti tərəfindən aparılan tikintinin sürətindən razılığını bildirib. Gürcüstan ərazisinin Marabda-Karsaxi dəmir yolu hissəsi "Azərinşaatservis" şirkəti tərəfindən tikilir.
"Bizim işin sürəti və keyfiyyəti ilə bağlı heç bir iddiamız yoxdur", - nazir deyib.
O qeyd edib ki, Bakı-Tbilisi-Qars dəmir yolunun tikintisi Azərbaycan və Gürcüstan üçün böyük əhəmiyyət daşıyır və o, regiondakı iri layihələrdən biri olacaq. "Böyük həcmdə iş görülüb və hesab edirəm ki, Bakı-Tbilisi-Qars dəmiryol xətti 2013-cü ildə təhvil veriləcək", - Nikolaşvili bildirib.
Bakı-Tbilisi-Qars dəmiryolunun tikintisi 2007-ci il fevralın 8-də Gürcüstan-Azərbaycan-Türkiyə dövlətlərarası sazişi əsasında həyata keçirilir.
Bakı-Tbilisi-Qars layihəsi çərçivəsində dəmiryol magistralının yeni 105 km.-lik qolunun tikintisi də planlaşdırılır. Bunun 76 km.-i Türkiyə, 29 km.-i isə Gürcüstan ərazisindən keçəcək.
Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km.-lik Axalkalaki-Marabda-Tbilisi dəmir yolunun 183 km.-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.